Deall sut dylai stopio a chwilio ddigwydd

Rhagor o wybodaeth am stopio a chwilio:

Pwy gall eich stopio a chwilio

Gall swyddog heddlu neu swyddog cymorth/cefnogi cymunedol yr heddlu (SCCH) mewn lifrai eich stopio. Gall swyddogion yr heddlu eich chwilio hefyd.  Mae SCCH yn cael eich chwilio chi am dybaco, sigaréts, alcohol ac eitemau eraill os ydyn nhw wedi’u hawdurdodi. Nid oes yn rhaid i swyddog yr heddlu fod mewn lifrai ond rhaid iddo/iddi ddangos ei gerdyn gwarant (ID).

Lle gellir eich chwilio

Bydd stopio a chwilio yn digwydd gan amlaf mewn mannau cyhoeddus. Fodd bynnag, mae rhai pwerau, megis chwilio am arfau tanio neu gyffuriau, sy’n caniatáu i’r heddlu chwilio pobl yn unrhyw le.

Os ydych mewn man cyhoeddus, efallai y bydd angen i chi dynnu eich côt neu siaced a’ch menig, oni bai eich bod wedi cael eich stopio mewn perthynas â therfysgaeth neu pan fo’r swyddog yn credu eich bod yn defnyddio dillad i guddio pwy ydych chi.

Os ydych chi'n gwisgo unrhyw beth am resymau crefyddol, a bod y swyddogion angen ichi ei dynnu, mae’n rhaid iddyn nhw fynd â chi o olwg y cyhoedd.

Beth i'w ddisgwyl yn ystod stopio a chwilio

Rhaid i'r swyddog heddlu neu’r swyddog cymorth cymunedol egluro pam rydych chi’n cael eich stopio a pham maen nhw’n gofyn ichi roi cyfrif am eich gweithredoedd neu am eich presenoldeb mewn ardal.

Gall pob aelod o'r cyhoedd gael eu stopio, gan gynnwys grwpiau y gellid barnu eu bod nhw’n agored i niwed a'r rhai dan 18 oed. Bydd y swyddog yn ystyried lles a diogelwch y person bob amser. Bydd gofal arbennig yn cael ei roi i sicrhau eu bod nhw’n deall beth sy’n digwydd, na fyddan nhw’n ofidus, a bod eu hanghenion yn cael eu hystyried.

Rhaid i’r swyddog fod yn gwrtais a pharchus bob amser.

Rydym yn ymwybodol y gallai’r broses gymryd rhywfaint o amser ond dylid ei thrin yn gyflym ac yn broffesiynol. Efallai y bydd y swyddog heddlu yn gofyn ychydig o gwestiynau ac yna, os yw’n teimlo bod hynny’n angenrheidiol, yn eich chwilio.

Gwybodaeth y byddwch chi'n ei chael

Mae swyddogion yr heddlu yn defnyddio’r acronym Saesneg GOWISELY - mae pob llythyren yn sefyll am wybodaeth mae'n rhaid iddyn nhw ei rhoi ichi os cewch chi’ch stopio a'ch chwilio. Mae hyn yn cynnwys:

• eich bod yn cael eich cadw at ddiben chwiliad
• pam y cawsoch eich stopio a’ch chwilio
• pam y gwnaethant eich dewis chi
• am beth maen nhw’n chwilio
• eu henw a’r orsaf lle mae wedi’u lleoli (oni bai bod y chwiliad yn ymwneud ag amheuaeth o weithgarwch terfysgol neu y gallai rhoi enw beryglu diogelwch swyddog).
• rhaid iddo/iddi ddangos ei gerdyn/cherdyn gwarant os nad mewn lifrai
• y gyfraith y cawsoch eich atal oddi tani
• eich hawl i gael copi o’r ffurflen

Yr wybodaeth y gofynnir ichi amdani

Bydd y swyddog heddlu yn gofyn i chi am eich:

• enw a’ch cyfeiriad
• dyddiad geni
• ethnigrwydd hunan-ddiffiniedig

Nid oes yn rhaid i chi roi’r wybodaeth hon os nad ydych am wneud hynny; oni bai bod y swyddog heddlu yn dweud ei fod yn eich riportio chi am drosedd.

Bydd y swyddog hefyd yn gofyn a oes gennych chi Orchmynion Lleihau Trais Difrifol (SVRO). Os oes gennych chi SVRO, mae angen ichi ddweud wrth y swyddog. Mae’n drosedd peidio â dweud.

Recordio achosion o stopio a chwilio

Mae defnydd o gamerâu fideo a wisgir ar y corff yn helpu i dawelu meddwl y cyhoedd bod eu cysylltiad â’r heddlu yn cael ei recordio. Mae’r dechnoleg yn cynnig mwy o dryloywder i’r rheini sydd o flaen y camera yn ogystal â’r rheini y tu ôl iddo.

Helpwch ni i wella'r profiad

Mae croeso i’ch adborth er mwyn inni adolygu a gwella sut mae stopio a chwilio yn cael ei wneud yn y gymuned. Dwedwch wrthon ni am eich profiad chi o stopio a chwilio.