Cyn ichi wneud cais: tystysgrif arf tanio neu dystysgrif dryll
Os ydych chi eisiau bod yn berchen ar arf tanio neu ddryll, mae angen ichi wneud cais am dystysgrif.
Bydd angen ichi:
- llenwi ffurflen gais
- talu'r ffi ymgeisio
Os oes gennych chi dystysgrif yn barod, ond bod honno wedi dod i ben, rhaid ichi wneud cais am dystysgrif newydd.
Gallwch ddefnyddio'r broses ymgeisio hon hefyd i adnewyddu tystysgrif sy'n bodoli eisoes.
Pa dystysgrif sydd arnoch ei hangen?
Nodweddion y gwn sy’n diffinio'r dystysgrif, nid ei enw.
| Y math o wn | Priodweddau | Tystysgrif arf tanio | Tystysgrif dryll |
| Arf tanio | Baril rhigoledig, yn saethu bwledi neu getris |
✓ | |
| Dryll neu fysged | Baril llyfn, yn saethu cetris neu getris gwag |
✓ | |
| Dryll aml-ergyd | Yn gallu dal mwy na thair cetrisen |
✓ | |
| Reiffl aer | Egni cinetig o fwy na 12 troedfedd y pwys |
✓ |
Mae yna amgylchiadau lle cewch saethu heb dystysgrif.
Rhagor o wybodaeth am gyfraith trwyddedu arfau tanio yn y Deyrnas Unedig.
Pwy sy’n cael gwneud cais
Mae yna gyfyngiadau oedran ar gyfer tystysgrifau arf tanio a thystysgrif dryll. Gwiriwch y rhain cyn dechrau eich cais.
Carchar neu ddedfryd ohiriedig
Gallwch wneud cais am dystysgrif bum mlynedd ar ôl eich dyddiad rhyddhau os:
- bod eich dedfryd o garchar (neu ddedfryd ohiriedig) yn dri mis, neu’n fwy na thri mis ac yn llai na thair blynedd o hyd
Gallwch wneud cais am dystysgrif bum mlynedd o’r ail ddiwrnod ar ôl cael eich dedfrydu os:
- bod eich dedfryd o garchar wedi’i gohirio a’i bod yn dri mis, neu’n fwy na thri mis ac yn llai na thair blynedd o hyd
Ni allwch wneud cais am dystysgrif os:
- bod eich dedfryd o garchar (neu ddedfryd ohiriedig) yn dair blynedd neu fwy
Beth sydd arnoch ei angen er mwyn gwneud cais
Cyn ichi ddechrau ar eich cais, mae yna bethau y bydd angen eu paratoi ymlaen llaw:
Bydd angen i chi ddarparu llun pasbort ohonoch chi’ch hun.
Rhaid i’ch ffotograff chi:
- bod yn wir bortread
- dangos eich wyneb llawn heb orchudd pen (oni bai am resymau crefyddol neu feddygol)
- bod â chefndir lliw hufen neu lwyd (heb eitemau neu bobl yn y cefndir)
Rhaid ichi:
- edrych yn syth i’r camera
- bod yn niwtral o ran golwg gyda’ch llygaid yn agored a’ch ceg ynghau
- peidio â gwisgo sbectol haul neu sbectol ag arlliw
- peidio â bod â ‘llygaid coch’
Rhaid defnyddio llun digidol ar gyfer ceisiadau ar-lein.
Rhaid i'ch llun digidol:
- bod mewn fformat .jpg neu .jpeg
- peidio â bod yn fwy nag 1MB o ran maint y ffeil
Byddwn yn gofyn ichi roi manylion dau ganolwr.
Bydd angen i chi ddarparu:
- eu dyddiad geni
- eu man geni
- eu galwedigaeth
- eu manylion cyswllt
Cyn ichi wneud cais, mae angen i chi:
- darllen nodiadau cyfarwyddyd y cais i weld y rheolau ynghylch pwy sy’n cael gweithredu fel canolwr ichi
- rhannu’r canllawiau i ganolwyr gyda'ch canolwyr dewisol
Eich manylion cysylltu, gan gynnwys:
- eich cyfeiriad e-bost
- eich rhif ffôn
- eich manylion cysylltu yn y gwaith (os nad ydych chi'n ddi-waith neu wedi ymddeol)
- eich cyfeiriadau blaenorol os nad ydych chi’n byw yn eich cyfeiriad presennol ers mwy na phum mlynedd
I gael gwybodaeth am sut rydyn ni’n trin data, darllenwch ein nodiadau cyfarwyddyd ynghylch gwneud cais.
Bydd angen ichi ddarparu'r wybodaeth ganlynol:
- manylion unrhyw amodau perthnasol y mae angen ichi eu datgelu (fe welwch chi restr o'r rhain yn y nodiadau cyfarwyddyd)
- enw, cyfeiriad, cod post, cyfeiriad ebost a rhif ffôn practis eich meddyg teulu
- unrhyw wybodaeth flaenorol am feddyg teulu neu feddygfa (o fewn y 10 mlynedd diwethaf)
- os oes adegau wedi bod pan nad oeddech chi wedi cofrestru gyda meddyg teulu neu bractis yn y Deyrnas Unedig, bydd angen inni wybod am hyn a byddwn yn gofyn pam roedd hyn ac a oes unrhyw wybodaeth y gallwch ei rhoi inni am hyn, er enghraifft, os ydych yn y lluoedd arfog ac wedi cael eich anfon dros y môr
- eich profforma meddyg teulu wedi’i llenwi. Bydd angen ichi lawrlwytho hon a chael eich meddyg teulu i'w llenwi. Yna ei chyflwyno fel rhan o'ch cais. Os ydych chi’n ei chyflwyno ar-lein, dylai fod ar ffurf PDF neu .jpeg/jpg
Sylwer: Mae'r ffurflen lawrlwytho profforma'ch meddyg teulu ar gael yn Saesneg yn unig ar hyn o bryd. Cyhoeddir fersiynau Cymraeg cyn gynted ag y cânt eu derbyn gan y Swyddfa Gartref. Os oes angen cymorth arnoch i lenwi'r ffurflenni yn y Gymraeg, cysylltwch â'r tîm arfau tanio.
Os ydych chi’n gwneud cais am dystysgrif arf tanio, byddwn yn gofyn i chi roi:
- calibr
- math
- rheswm da dros ei gael
- calibr a niferoedd y bwledi neu’r cetris
- sut a ble y bydd yr arf(au) tanio yn cael eu storio
Byddwn ni’n gofyn ichi roi manylion am unrhyw un neu ragor o’r canlynol:
- euogfarnau
- rhybuddion ysgrifenedig
- gwarediadau y tu allan i'r llys
- rhwymiadau
- ceryddon
- hysbysiadau cosb benodedig (gan gynnwys goryrru, ond heb gynnwys troseddau parcio)
Byddwn yn gofyn am y dyddiad (y mis a’r flwyddyn).
I gael rhagor o wybodaeth, darllenwch nodiadau cyfarwyddyd y cais.
Os ydych yn storio eich arf tanio neu ddryll gartref, byddwn yn gofyn am fanylion unrhyw un a allai fod â mynediad heb oruchwyliaeth. Er enghraifft, teulu neu lanhawyr.
Bydd angen i chi roi eu:
- enw
- enwau blaenorol
- dyddiad geni
- man geni
- perthynas i chi
Byddwn yn gofyn ichi roi manylion unrhyw dir preifat neu glwb cofrestredig lle byddwch chi’n defnyddio’ch arf tanio.
Tir preifat
Bydd angen i chi ddarparu:
- manylion cysylltu’r tirfeddiannwr
- disgrifiad o'r tir, gan gynnwys ei faint
- y rheswm pam rydych chi’n dymuno saethu ar y tir
- gwybodaeth am a yw'r tir wedi'i awdurdodi gan yr heddlu
Clwb saethu
Bydd angen ichi ddarparu:
- enw'r clwb
- manylion y swyddog a enwebwyd
- rhif cymeradwyaeth y Swyddfa Gartref
Os ydych chi’n adnewyddu, bydd angen ichi ddarparu copi llawn o'ch tystysgrif(au) presennol, gan gynnwys tabl un a dau.
Gwneud cais neu adnewyddu
Defnyddiwch ein gwasanaeth gwneud cais i ddechrau. Bydd yn dweud wrthoch chi sut i wneud cais, faint y bydd angen ichi ei dalu a pha mor hir y bydd yn ei gymryd i gael tystysgrif.
Ar ôl ichi wneud cais
Os ydych chi wedi cyflwyno’ch cais ar-lein, gallwch lawrlwytho copi ar gyfer eich cofnodion eich hun.
Byddwn yn cynnal gwiriadau cefndir. Mae hyn yn cynnwys cysylltu â chanolwyr ac, os yw'n berthnasol, eich meddyg teulu.
Byddwn ni hefyd yn asesu’ch addasrwydd i gael tystysgrif. Fel rhan o'r asesiad, bydd swyddog ymholiadau arfau tanio (FEO) yn cyfweld â chi yn eich cyfeiriad cartref.
Pan fyddwn ni wedi penderfynu ar eich cais, byddwn yn cysylltu â chi i roi gwybod ichi am y canlyniad.