Parcio tu allan i ysgolion

Mae amseroedd gollwng a chasglu plant yn brysur y tu allan i ysgolion. Gall hyn achosi mwy o risg diogelwch i blant a rhieni.

Mae cyfyngiadau parcio y tu allan i ysgolion yno i’ch cadw chi a’ch plant yn ddiogel. Gall parcio’n anystyriol roi pobl mewn perygl a gallwch hefyd gael dirwy. Mae’n bwysig bod modurwyr yn dilyn Rheolau'r Ffordd Fawr.

Cyfyngiadau parcio tu allan i ysgolion

Deall llinellau igam-ogam melyn

Mae gan y rhan fwyaf o fynedfeydd ac allanfeydd ysgolion yn y DU linellau ffordd igam-ogam melyn gyda’r geiriau ‘Ysgol Cadwch yn Glir’ neu ‘School Keep Clear’.

Mae llinellau igam-ogam i’w gweld hefyd wrth fynedfeydd ac allanfeydd ysbytai, gorsafoedd tân, gorsafoedd heddlu a gorsafoedd ambiwlans. Maent yn nodi’r rhan o’r ffordd lle na ddylai modurwyr aros, stopio na pharcio cerbyd.

Weithiau gall fod arwydd yn cyd-fynd â’r llinellau sy’n dangos adegau penodol pan fydd y cyfyngiadau hyn mewn grym. Mae gan fodurwyr hawl cyfreithiol i barcio ar y llinellau igam-ogam y tu allan i’r oriau hyn.

Mae llinellau igam-ogam melyn a gwyn hefyd yn dangos mannau sy’n rhaid eu cadw’n glir fel bod plant a defnyddwyr eraill y ffordd yn gallu gweld yn glir wrth groesi.

Parcio ar linellau igam-ogam melyn

Gallwch barcio’n gyfreithlon ar linellau igam-ogam melyn o dan rai amgylchiadau.

Mae llinellau igam-ogam melyn heb arwyddion gyda hwy yn dweud wrth fodurwyr am beidio ag aros na pharcio yno ar unrhyw adeg er diogelwch plant a phobl eraill. Gallwn, a byddwn yn, rhoi tocynnau am barcio arnynt, ar sail achosi rhwystr i fodurwyr neu gerddwyr eraill.

Mae gan rai farciau igam-ogam melyn linell felen sengl neu ddwbl, sy’n dynodi gwahanol gyfyngiadau parcio.

Gallwch ddysgu rhagor yn:

Rheolau'r Ffordd Fawr - Aros a pharcio

Rheolau'r Ffordd Fawr - Marciau Ffyrdd

Parcio gyferbyn â llinellau igam-ogam melyn

Yn gyfreithiol gallwch barcio gyferbyn â llinellau igam-ogam melyn. Fodd bynnag, gall hyn wneud croesi’r ffordd yn fwy peryglus, yn enwedig i blant. Mae gan rai ysgolion linellau igam-ogam melyn ar ddwy ochr y ffordd am y rheswm hwn.

Awgrymiadau diogelwch ar gyfer parcio tu allan i ysgolion

Wrth ollwng neu gasglu plant mewn ysgolion, dylech wneud y canlynol:

• Rhowch ddigon o amser i’ch hun gan fod yr ardal yn debygol o fod yn brysur.
• Peidiwch â pharcio ar linellau igam-ogam melyn ac osgowch barcio gyferbyn â hwy.
• Os byddwch yn penderfynu parcio ymhellach i ffwrdd, byddwch yn ystyriol o drigolion lleol a pheidiwch â rhwystro mynedfeydd.

Dirwyon

Gall cynghorau lleol roi Hysbysiadau Tâl Cosb (PCN) i fodurwyr am aros, stopio neu barcio ar linellau igam-ogam melyn os oes cyfyngiadau mewn grym. Rhoddir y rhain gan swyddogion gorfodi sifil.

Mae’r rhan fwyaf o ddirwyon parcio neu aros bellach yn cael eu gorfodi fel mater sifil, yn hytrach na mater i’r heddlu. Nid yw PCN yn arwain at gofnod troseddol neu bwyntiau ar drwydded os yw’r cyngor yn delio a’r mater.

Mewn rhai ardaloedd nid oes gan y cyngor lleol bwerau gorfodi parcio sifil. Yn yr ardaloedd hyn mae parcio’n cael ei orfodi gennym ni neu gan wardeniaid traffig a gyflogir gan yr heddlu a fydd yn rhoi hysbysiad cosb benodedig (FPN). Gorfodir y rhain drwy’r system cyfiawnder troseddol.

Gall dirwyon amrywio yn dibynnu ar y lleoliad. Bydd stopio mewn ardal â chyfyngiadau y tu allan i ysgol yn arwain at ddirwy uwch. Mae’r ffi hefyd yn cael ei haneru os caiff ei thalu o fewn 14 diwrnod ac mae gennych 28 diwrnod i dalu neu herio’r ddirwy.

Materion parcio eraill

Dysgu rhagor am faterion parcio eraill a cherbydau wedi'u gadael