Cynlluniau ymwybyddiaeth diogelwch ar y ffyrdd
Rydym yn cynnal nifer o gynlluniau i helpu i leihau nifer y damweiniau ar ffyrdd. Yn aml, mae’r cynlluniau hyn yn ymwneud â ni’n patrolio’r ffyrdd gan ddefnyddio cerbydau a dyfeisiau arbenigol.
Gallwch ddysgu mwy am y gwahanol gynlluniau isod.
Ymgyrch Tutelage (gyrru heb yswiriant)
Menter blismona genedlaethol yw Ymgyrch Tutelage i leihau nifer y gyrwyr sy’n gyrru heb yswiriant.
Os bydd cerbyd yn cael ei weld ar y ffordd a bod systemau'r heddlu a'r gronfa ddata yswiriant modur yn dangos nad yw wedi'i yswirio, mae llythyr yn cael ei anfon at y ceidwad cofrestredig yn ei annog i yswirio'r cerbyd.
Mae’r llythyr yn annog y ceidwad cofrestredig i edrych i weld a oes problem ynglŷn ag yswiriant y cerbyd, ac i gywiro pethau.
Y gosb am y drosedd o yrru cerbyd heb yswiriant yw cosb benodedig o £300 a chwe phwynt cosb ar eich trwydded neu, os aiff yr achos i'r llys, fe allech gael dirwy ddiderfyn a chael eich anghymhwyso rhag gyrru.
Os ydych chi'n credu eich bod wedi cael llythyr gan Ymgyrch Tutelage drwy gamgymeriad:
- Cysylltwch â'ch cwmni yswiriant a gwiriwch fod polisi gennych.
- Os nad oedd eich car yn cael ei yrru ar y diwrnod a nodwyd, anfonwch neges ebost drwy'r cyfeiriad ar eich llythyr oddi wrth Ymgyrch Tutelage â’r geiriau 'Cerbyd heb fod yn cael ei yrru' yn y llinell pwnc.
- Os nad yw’r cerbyd yn perthyn ichi mwyach, gwiriwch ar wefan y llywodraeth eich bod wedi rhoi’r wybodaeth gywir i unrhyw brynwr ac i’r DVLA wrth ichi werthu’r cerbyd.
- Mae angen i unrhyw newidiadau yn eich plât rhif personol gael eu trosglwyddo i'ch cwmni yswiriant. Mae rhagor o wybodaeth ar gael ynghylch platiau rhif personol ar gov.uk.
Ymgyrch Tramline (gyrru peryglus)
Ymgyrch Tramline yw ein prosiect diogelwch ffyrdd cenedlaethol cerbydau nwyddau trwm (HGV), a gynhelir mewn partneriaeth â Phriffyrdd Cenedlaethol.
Rydym yn defnyddio cabiau camera HGV arbenigol i ganfod gyrru peryglus ar y ffyrdd. Mae’r olwg uwch o gerbydau HGV yn ei gwneud hi’n haws i ni weld troseddau gyrru megis defnyddio ffôn symudol, ddim yn gwisgo gwregys diogelwch, a gyrwyr nad ydynt mewn rheolaeth briodol o’u cerbyd.
Dysgu mwy am Ymgyrch Tramline.
Gwylio Cyflymder Cymunedol (goryrru)
Menter genedlaethol yw Gwylio Cyflymder Cymunedol lle rydym yn helpu cymunedau lleol i gofnodi manylion cerbydau sy’n goryrru gan ddefnyddio dyfeisiau arbennig.
Ysgrifennir at bobl sy’n cael eu dal yn torri’r terfyn cyflymder i sôn am risgiau eu gyrru peryglus.
Bydd yr heddlu lleol yn ymweld â rhai sy’n troseddu dro ar ôl tro a gallent wynebu erlyniad troseddol.
Ymgyrch Close Pass (diogelwch i feicwyr a marchogion ceffylau)
Mae Ymgyrch Close Pass wedi’i chynllunio i dargedu modurwyr sy’n anwybyddu Rheolau’r Ffordd Fawr yn ymwneud â goddiweddyd beicwyr a reidwyr ceffylau.
Mae’r ymgyrch yn defnyddio swyddog heddlu mewn dillad plaen ar feic (sydd â chamera fideo) i gadw llygad am fodurwyr sydd ddim yn gadael y lle gofynnol wrth basio beicwyr a reidwyr ceffylau.
Os gwelir modurwyr sydd ddim yn gadael y lle priodol, yna bydd yr heddlu’n ymyrryd ac yn cymryd camau priodol.
Pasio beicwyr a reidwyr ceffylau yn ddiogel
Mae Rheolau’r Ffordd Fawr yn dweud y dylech roi o leiaf cymaint o le i feicwyr a reidwyr ceffylau ag y byddech wrth oddiweddyd car.
Os ydych chi’n pasio beiciwr, yr isafswm pellter pasio diogel yw:
- 1.5 metr ar gyfer cyflymderau hyd at 30 milltir yr awr (mya)
- 2 fetr ar gyfer cyflymderau dros 30mya
Os ydych chi’n pasio reidwyr ceffylau neu gerbyd a dynnir gan geffyl, argymhellir eich bod yn:
- pasio ar gyflymder o ddim mwy na 10mya
- gadael o leiaf 2 fetr
Mwy o gyngor diogelwch i yrwyr
Wrth yrru ger beicwyr:
- Gall beicwyr reidio yng nghanol y lôn os yw ffordd yn gul neu’n dawel, neu os ydynt mewn traffig prysur neu wrth gyffordd. Gadewch iddynt wneud hynny er eu diogelwch eu hunain ac fel y gellir eu gweld.
- Weithiau gall grwpiau o feicwyr reidio dau ochr yn ochr i’w helpu i gael eu gweld. Gadewch iddynt wneud hynny er eu diogelwch eu hunain ac fel y gellir eu gweld.
- Efallai y bydd angen i feicwyr wyro i osgoi arwynebau ffyrdd anwastad neu rwystrau, megis mannau gwlyb a rhewllyd. Rhowch gymaint o le â phosibl iddynt wrth eu pasio.
Wrth yrru ger reidwyr ceffylau:
- Ar rannau cul o ffordd, gall reidwyr ceffylau reidio yng nghanol y lôn. Gadewch iddynt wneud hynny er eu diogelwch eu hunain ac fel y gellir eu gweld.
- Peidiwch â dychryn ceffylau trwy ganu’ch corn, cyflymu’r injan neu gyflymu’n sydyn ar ôl i chi fynd heibio iddynt.
- Efallai y bydd angen i reidwyr ceffylau symud yn sydyn i osgoi rhwystrau, megis lympiau neu fannau gwlyb a rhewllyd. Rhowch gymaint o le â phosibl iddynt a gyrrwch yn araf wrth eu pasio.
Dysgwch fwy yn Rheolau’r Ffordd Fawr am ddefnyddwyr ffyrdd sydd angen gofal ychwanegol.