Arestio trydydd person yn dilyn digwyddiad yn ymwneud ag arfau tanio yn Nhreforys

Mae trydydd person wedi cael ei arestio yn rhan o ymchwiliad parhaus i ddigwyddiad yn ymwneud ag arfau tanio a ddigwyddodd tua 4:15pm ar Heol Clase A48, Abertawe, ddydd Gwener 6 Tachwedd.

Cafodd dyn 29 oed o Abertawe ei arestio fore Sadwrn (7 Tachwedd) ar amheuaeth o affräe a bod ag arf ymosodol yn ei feddiant. Mae'n parhau i fod yn nalfa'r heddlu.

Cafodd ei arestio wedi i'r heddlu arestio dau ddyn ymhen oriau ar ôl i'r digwyddiad gael ei riportio ddoe. Arestiwyd dyn 41 oed o Lansamlet ar amheuaeth o fod ag arf tanio yn ei feddiant gyda'r bwriad o beryglu bywyd, ac arestiwyd bachgen 16 oed o Lansamlet ar amheuaeth o affräe. Mae’r ddau yn nalfa’r heddlu ar hyn o bryd wrth i'n hymholiadau barhau.

Nid yw anafiadau'r person a aeth at yr heddlu yn gysylltiedig â'r digwyddiad yn ôl pob tebyg. Nid yw Heddlu De Cymru yn ymwybodol o unrhyw un a gafodd ei anafu mewn cysylltiad â'r digwyddiad hwn.

Mae ditectifs o Dîm Ymchwilio i Droseddau Mawr Heddlu De Cymru yn parhau i ymchwilio i amgylchiadau'r digwyddiad. Maen nhw'n apelio ar unrhyw un a welodd yr hyn a ddigwyddodd, neu sydd â lluniau camera cerbyd, teledu cylch cyfyng neu ffôn symudol i gysylltu â nhw.

Dywedodd y Prif Uwch-arolygydd, Stephen Jones:

"Mae ein hymchwiliad, sy'n cynnwys timau o dditectifs a staff arbenigol, yn parhau. Mae nifer sylweddol o ymholiadau wedi cael eu cynnal ers y digwyddiad nos Wener.
"Er bod ymholiadau'n mynd rhagddynt o hyd, rydym yn credu ei bod hi'n debygol bod yr unigolion yn nabod ei gilydd. Mae digwyddiadau fel hyn yn brin, ond rydym yn gwerthfawrogi eu bod yn achosi cryn bryder i gymunedau lleol. Nid ydym yn ymwybodol o unrhyw fygythiad ehangach i'r cyhoedd ar hyn o bryd.
"Bydd presenoldeb amlwg yr heddlu yn parhau yn yr ardal wrth i swyddogion barhau i gynnal ymholiadau a thawelu meddyliau trigolion lleol.
"Gofynnwn yn daer ar unrhyw un sydd ag unrhyw wybodaeth i gysylltu â ni."

Mae Heddlu De Cymru yn ymwybodol bod rhai pobl wedi lledaenu sïon am y digwyddiad ac yn ceisio dyfalu am yr hyn a ddigwyddodd ar y cyfryngau cymdeithasol. Gofynnwn i chi beidio â rhannu gwybodaeth sydd heb ei dilysu ac, yn lle hynny, ddibynnu ar y diweddariadau gan ffynonellau swyddogol a dibynadwy.

Gofynnir i unrhyw un a welodd yr hyn a ddigwyddodd, neu sydd â gwybodaeth neu ddeunydd fideo a allai gynorthwyo'r ymchwiliad, gysylltu â Heddlu De Cymru drwy ddefnyddio'r Porth Cyhoeddus Digwyddiadau Mawr: https://mipp.police.uk/operation/62SWP26C43-PO1

Gellir hefyd roi gwybodaeth yn ddienw drwy ffonio Crimestoppers ar 0800 555 111.