Tîm Bws Diogelwch yn helpu i achub bywyd dyn yng nghanol dinas Caerdydd

Mae staff ar ein Bws Diogelwch wedi helpu i achub bywyd dyn oedd yn dioddef ataliad ar y galon yng nghanol dinas Caerdydd.

Roedd y Bws Diogelwch yn digwydd bod gerllaw pan ddaeth galwad i'r ystafell reoli yn gofyn am gymorth yn ystod oriau mân ddydd Sadwrn, 30 Mai.

Cafwyd hyd i ddyn 36 oed wedi cwympo ac yn anymatebol ar Stryd y Santes Fair ger Gwesty'r Clayton.

Dechreuodd swyddog heddlu roi adfywiad cardiopwlmonaidd (CPR) a defnyddiodd dau fyfyriwr heddlu ddiffibriliwr sy'n cael ei gadw ar y bws, nes i ambiwlans gyrraedd.

Yn ffodus, daeth y dyn yn ymatebol, dechreuodd siarad, a chafodd ei gludo i'r ysbyty.

Mae Bysiau Diogelwch Caerdydd yn patrolio canol y ddinas ar nos Fercher yn ystod tymhorau academaidd, ac ar nos Wener a nos Sadwrn drwy gydol y flwyddyn.

Maent yn cael eu cynnal gan swyddogion a gwirfoddolwyr i helpu unrhyw un a allai fod yn agored i niwed. Nid ydynt ar gyfer myfyrwyr yn unig.

Gwneir hyn trwy:

• Gynnwys cyflenwadau meddygol hanfodol gan gynnwys diffibriliwr
• Patrolio ardaloedd economi'r nos yng Nghaerdydd ac yn ystod digwyddiadau mawr
• Helpu pobl sy’n agored i niwed sydd angen cymorth.

Mae'r fenter wedi helpu i sicrhau bod miloedd o bobl sydd wedi cael eu hunain mewn sefyllfa agored i niwed neu lle roedd eu diogelwch personol mewn perygl, wedi eu cludo i'w cartrefi neu le arall diogel, fel y Ganolfan Trin Alcohol.

Ers mis Medi 2021, mae mwy na 3,000 o bobl agored i niwed, gan gynnwys 270 ers mis Ionawr 2026, wedi cael eu diogelu gan y tîm Bws Diogelwch.

Dywedodd yr Arolygydd Rya Cowan-Davies, o Heddlu De Cymru:

"Mae gan Gaerdydd hanes rhagorol o weithio mewn partneriaeth sy'n helpu i sicrhau bod ein heconomi nos yn ddiogel yn ogystal â bywiog a chroesawgar.
“Mae'r Bws Diogelwch yn un enghraifft o'r gwaith sy'n cael ei wneud i gadw canol y ddinas a'r ardal gyfagos yn ddiogel.
“Mae'r tîm yn weladwy ac yn canolbwyntio ar ddioddefwyr, ac ar y penwythnos, helpodd y dull hwn i achub bywyd dyn.”