Carcharu dyn o Ferthyr am dreisio merch

Mae dyn o Ferthyr wedi cael ei ddedfrydu i 15 mlynedd yn y carchar ar ôl iddo gael ei ganfod yn euog o dreisio merch o dan 16 oed yn y gorffennol.

Fe ymosododd Stephen Thomas, 51 oed o Ferthyr, sawl gwaith ar y dioddefwr dros gyfnod o bum mlynedd.

Ym mis Mai, cafwyd Thomas yn euog o un cyhuddiad o dreisio merch o dan 16 oed a saith cyhuddiad o ymosod ar ferch o dan 13 oed.

Dedfrydwyd Thomas i 15 mlynedd o garchar pan ymddangosodd gerbron Llys y Goron Merthyr Tudful ddydd Gwener 5 Mehefin. Mae hefyd wedi cael gorchymyn atal niwed rhywiol sy'n ei wahardd rhag cael cyswllt ag unrhyw ferch o dan 16 oed heb oruchwyliaeth.

Dywedodd y Ditectif Gwnstabl Emily Barnett: “Roedd y dioddefwr yn eithriadol o ddewr a chryf yn dod i siarad â ni, yn enwedig gan fod cymaint o flynyddoedd wedi mynd heibio ers i'r troseddau hyn gael eu cyflawni.

“Mae’r ymchwiliad hwn, sydd wedi arwain at ddwyn Stephen Thomas i gyfrif, wedi bod yn un hir a chymhleth, ac mae'r ddedfryd hon yn dangos difrifoldeb ei droseddau.”