Carcharu dyn o'r Barri am dreisio menyw

Mae Toby Rogers wedi cael ei garcharu am 10 mlynedd am dreisio menyw.

Plediodd Rogers, 34, o'r Barri, yn euog i drais, ymosodiad drwy dreiddio, ymosodiad drwy guro a difrod troseddol.

Cafodd ei ddedfrydu yn Llys y Goron Caerdydd ar 12 Mehefin i 10 mlynedd yn y carchar.

Hefyd gwnaed Rogers yn destun Gorchymyn Atal am 20 mlynedd i amddiffyn y dioddefwr ymhellach.

Ac yn ogystal, bydd yn rhaid iddo gofrestru fel troseddwr rhyw am oes.

Yn ei datganiad am yr effaith arni, disgrifiodd y dioddefwr effaith trosedd Rogers, y gorbryder y mae hi wedi'i ddioddef, a sut mae hi'n ceisio ailadeiladu ei bywyd.

"Mae wedi effeithio ar bob agwedd ar fy mywyd, ac rwy'n parhau i fyw gyda'r effeithiau bob dydd.

"Er fy mod bellach yn dechrau cydnabod difrifoldeb yr hyn rydw i wedi'i brofi, mae wedi cymryd amser hir i gyrraedd y sefyllfa hon.

"Rwy'n gobeithio ei fod ef yn gallu deall effaith ei weithredoedd a dod o hyd i ffordd o newid er gwell."

Dywedodd y swyddog ymchwilio, y Ditectif Gwnstabl Jamie Dale o Heddlu De Cymru: "Ni ddylid diystyrru'r dewrder sydd ei angen i gamu ymlaen a riportio troseddau fel hyn.

“Rydym yn gobeithio y bydd y ddedfryd hon yn helpu'r dioddefwr i ailadeiladu ei bywyd a gwella ar ôl y digwyddiadau erchyll hyn.

"Bu llawer iawn o waith fel rhan o'r ymchwiliad hwn ac yn sgîl hyn credwn nad oedd opsiwn arall gan Rogers heblaw pledio'n euog ac felly atal y dioddefwr rhag gorfod rhoi tystiolaeth yn y llys."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a riportio digwyddiadau o'r math.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Ceir cyfoeth o wybodaeth a manylion am wasanaethau cymorth yma.