Ymateb Heddlu De Cymru i droseddau difrifol a chyfundrefnol wedi'i ddyfarnu'n 'dda' gan HMICRFS

Mae Heddlu De Cymru'n croesawu canfyddiadau Arolygiaeth Cwnstabliaeth a Gwasanaethau Tân ac Achub Ei Fawrhydi (HMICFRS) ar sut mae'r llu yn ymateb i droseddau difrifol a chyfundrefnol (SOC).

Mae'r adroddiad wedi cael ei gyhoeddi ochr yn ochr â chanlyniadau arolygiadau o Uned Troseddau Cyfundrefnol Ranbarthol Tarian (Tarian ROCU) a lluoedd eraill yn ne Cymru – Heddlu Dyfed Powys a Heddlu Gwent.

Mae SOC yn cynnwys troseddau fel masnachu cyffuriau, twyll, seiberdroseddu, cam-drin a chamfanteisio ar blant yn rhywiol yn ogystal â masnachu pobl. Gall canlyniadau troseddau o'r math fod yn ddinistriol.

Dyfarnodd yr arolygiaeth fod Heddlu De Cymru yn 'dda' wrth fynd i'r afael ag SOC.

Gwnaeth y Prif Gwnstabl Cynorthwyol Tom Williams groesawu'r craffu annibynnol ar swyddogion a gweithdrefnau'r llu, er mwyn sicrhau ei fod yn mynd i'r afael ag SOC yn effeithiol.

Dywedodd: "Mae'n rhaid i'r cyhoedd deimlo'n hyderus bod Heddlu De Cymru yn gallu canfod a chwalu troseddu difrifol a chyfundrefnol yn ein cymunedau yn effeithiol, ac rwy'n ddiolchgar am y craffu a'r adborth annibynnol yn yr adroddiad hwn.

"Mae'n braf gweld ein dyfarniad, a nododd ei bod hi'n amlwg bod y llu yn blaenoriaethu mynd i'r afael â throseddau difrifol a chyfundrefnol, bod strwythurau cryf ar waith i wneud hynny, a bod digon o gapasiti a gallu i fynd i'r afael â'r mater.

"Rydym wedi gweithio'n galed i sicrhau bod swyddogion a staff ar draws y llu yn deall yn glir fod SOC yn flaenoriaeth, a bod cynllun cyflawni ar waith i sicrhau y gallwn amddiffyn ein cymunedau rhag troseddu. Rydym hefyd wedi cyflwyno hyfforddiant i Swyddogion Cyfrifol Arweiniol ar lefel Ditectif Brif Arolygydd a 70 o Arolygwyr mewn timau plismona yn y gymdogaeth er mwyn safoni a gwella perfformiad.

"Drwy gynyddu ein galluoedd cuddwybodaeth drwy fentrau fel Crimestoppers, rydym yn rhagweithiol o ran nodi grwpiau troseddu cyfundrefnol newydd, ac mae dadansoddwr cuddwybodaeth ar gael i wella ein dealltwriaeth o'r ymddygiad troseddol a sut i fynd i'r afael â hynny.

"Mae ein gwaith wedi arwain at 3,395 o achosion o darfu ar droseddau difrifol a chyfundrefnol yn y flwyddyn a ddaeth i ben yn 2025, sef cynnydd o bron 100% o'i gymharu â'r flwyddyn flaenorol.

"Byddwn yn parhau i weithio gyda'n partneriaid ar waith tarfu a gorfodi, codi ymwybyddiaeth o droseddau cyllyll ac annog pobl ifanc i riportio, gan leihau niwed sy'n gysylltiedig â chyffuriau, a defnyddio'r holl ddeddfwriaeth sydd ar gael, fel y rhai hynny

sydd ar gael i swyddogion Safonau Masnach i fynd i'r afael â materion fel gwyngalchu arian a chamfanteisio."

Mae'r llu hefyd wedi cael ei gydnabod am fabwysiadu prosiectau Clirio, Dal, Adeiladu, a sefydlwyd rhagor o brosiectau ers cynnal yr arolygiad. Ar ôl gweithredu hyn yn Butetown, Caerdydd tua diwedd 2024, arestiwyd mwy na 500 o bobl a dyrannwyd 100 mlynedd o ddedfrydau o garchar hyd yn hyn. Yn Nyfaty, lle lansiwyd y cynllun tua dechrau 2025, cafwyd 28 o arestiadau yn ystod y ddau fis cyntaf, a gweithredwyd pum gwarant camddefnyddio cyffuriau. Yn ogystal, yr wythnos hon mae chwe aelod o grŵp troseddu cyfundrefnol wedi cael eu carcharu am dros 150 mlynedd am lofruddiaeth Joanne Penney yn 2025.

Gweithiodd tîm Troseddau Mawr y llu am gryn amser i arwain ymchwiliad a ganfu 12 o bobl sydd bellach wedi'u dyfarnu'n euog mewn cysylltiad â'r llofruddiaeth, gan dynnu sylw at ba mor bell y byddwn yn mynd er mwyn chwalu rhwydweithiau troseddu cyfundrefnol a sicrhau bod troseddwyr yn wynebu canlyniadau llawn eu gweithredoedd.

Ychwanegodd yr ACC Williams: "Mae cymunedau de Cymru yn haeddu byw mewn cymunedau sy'n ddiogel rhag troseddu difrifol a chyfundrefnol, ac rwy'n gobeithio y bydd yr adroddiad hwn yn tawelu eu meddyliau ein bod yn parhau i weithio'n galed i sicrhau bod hyn yn realiti."