Menter gan yr heddlu yn rhoi cymorth ychwanegol i ddioddefwyr trais domestig

Mae swyddogion yn Abertawe a Chastell-nedd Port Talbot wrthi'n cymryd rhan mewn menter beilot newydd sy'n gweithio i sicrhau diogelwch dioddefwyr ar law troseddwyr sydd wedi cael Gorchmynion Atal Trais Domestig (DVPOs) gan y llysoedd.

Mae swyddogion yn ymweld â dioddefwyr ac yn cynnal patrolau wedi'u targedu er mwyn sefydlu a yw telerau'r DVPO wedi'u torri.

Ers cychwyn y fenter beilot ar 1 Mehefin, mae swyddogion wedi gwneud dros 50 o ymweliadau â dioddefwyr a ddiogelir gan y gorchmynion hyn, gan arwain at nifer o ddioddefwyr yn meithrin yr hyder i baratoi datganiadau mewn perthynas â'u hachosion a thri arestiad am doriadau gan droseddwyr.

Dywedodd yr Arolygydd Carys Thomas:

"Mae'r troseddwyr hyn wedi cyflawni rhai o'r troseddau trais domestig gwaethaf a welsom yn ardaloedd Abertawe a Chastell-nedd Port Talbot, a byddwn yn gwneud popeth yn ein gallu i gadw ein dioddefwyr yn ddiogel rhag y troseddwyr hyn, gan eu helpu i dorri'n rhydd o'u cam-drin a symud ymlaen â'u bywydau o'r diwedd."

Dywedodd y Prif Uwch-arolygydd Stephen Jones, Comander yr Uned Reoli Sylfaenol:

"Ni ddylai neb deimlo'n anniogel yn ei gartref ei hun. Mae'r gorchmynion hyn yn cael eu cyhoeddi dim ond pan fo tystiolaeth glir o ymddygiad treisgar a chamdriniol ac mae'n gwbl gywir ac yn gwbl briodol ein bod yn cymryd camau gorfodi cadarn er mwyn cefnogi'r rhai hynny sydd wedi bod yn ddewr iawn wrth gamu ymlaen. Byddwn yn parhau i erlid y troseddwyr hyn, ac eisoes wedi gweld dedfryd o 28 niwrnod o garchar am dorri gorchymyn.

"Mae ein neges yn glir: mae trais yn y cartref yn gwbl annerbyniol. Os ydych chi neu un o'ch anwyliaid yn cael eich brifo, eich bygwth neu eich rheoli, dylech chi roi gwybod i ni. Byddwn yn gwrando arnoch chi, yn eich trin â pharch ac yn eich cefnogi."

Cam-drin domestig yw ymddygiad rheoli, bwlio, bygythiol neu dreisgar. Mae'n digwydd rhwng pobl 16 oed a hŷn a'u partneriaid, eu cyn-bartneriaid neu aelodau o'r teulu. Yn aml, gall hyn fod yn batrwm o gamdriniaeth, ond dim ond un achos o gam-drin sydd ei angen er mwyn i ni gymryd camau penderfynol. Gall ddigwydd i unrhyw un. Does dim ots beth yw eich ethnigrwydd, eich rhywedd, eich rhywioldeb neu'ch cefndir cymdeithasol.

Gall cam-drin domestig fod ar sawl ffurf. Nid yw bob amser yn cynnwys trais corfforol.

Os nad yw rhywbeth yn teimlo'n iawn, gallwch ei riportio.

Os nad ydych chi'n barod i siarad â'r heddlu, gallwch gysylltu â sefydliadau cymorth a fydd yn eich helpu, drwy ymweld â'n tudalen Sefydliadau Cymorth.

Os oes gennych bryder am ffrind neu aelod o'r teulu, gallwch roi gwybod amdano i ni drwy 101 neu ffonio Crimestoppers yn ddienw ar 0800 555111. Ffoniwch 999 bob amser mewn argyfwng.