Lansio cynllun gweithredu i fynd i'r afael ag ymddygiad gwrthgymdeithasol yn Ne Cymru

Mae cynllun gweithredu i fynd i'r afael ag ymddygiad gwrthgymdeithasol yn Ne Cymru'n cael ei lansio heddiw (15 Mehefin). 

Mae cynllun Mynd i'r Afael ag Ymddygiad Gwrthgymdeithasol Gyda'n Gilydd yn nodi sut y bydd Heddlu De Cymru'n cydweithio ag amrywiaeth o bartneriaid i dargedu troseddwyr, cefnogi cymunedau, a chynnig atebion hirdymor i broblemau lleol. Mae'n cynnig rhaglen weithredu glir fydd yn mynd i'r afael â throseddwyr mynych, cynyddu gwelededd mewn lleoliadau allweddol a darparu atebion mwy cyson i'r problemau sy'n effeithio ar gymunedau'n gyflymach. 

Mae'n adlewyrchu egwyddorion Gwarant Plismona yn y Gymdogaeth ac mae'n gyson â Chynllun Cyflawni Heddlu De Cymru a Chynllun Trosedd a Chyfiawnder Comisiynydd yr Heddlu a Throseddu. Mae uchelgais syml ond pwerus yn greiddiol i'r cynllun: darparu plismona amlwg, hygyrch, sy'n canolbwyntio ar ddioddefwyr sy'n mynd i'r afael â'r materion sydd o'r pwys mwyaf i'n cymunedau ac yn darparu gwasanaeth cyson, ansawdd uchel ledled De Cymru. 

Dywedodd y Prif Gwnstabl Cynorthwyol Trudi Meyrick: “Mae ymddygiad gwrthgymdeithasol yn parhau i fod yn un o'r materion sy'n effeithio ar ba mor ddiogel y mae pobl yn teimlo yn eu cartrefi, eu strydoedd a'u cymunedau. Caiff ei ddisgrifio'n aml fel “lefel isel”, ond i'r rhai sy'n cael profiad ohono, nid yw'r effaith yn un lefel isel. Gall ddifa hyder, niweidio llesiant, a thanseilio'r balchder sydd gan y bobl yn y lleoedd maent yn byw ac yn gweithio ynddynt. 

“Yn aml iawn, mae achosion ymddygiad gwrthgymdeithasol yn gymhleth ac yn cael eu cydblethu â gwendidau ehangach, angen heb ei ddiwallu a ffactorau amgylcheddol. Felly, mae partneriaeth yn greiddiol i'n dull gweithredu, gan weithio gydag awdurdodau lleol, byrddau iechyd, darparwyr tai, gwasanaethau ieuenctid, y sector gwirfoddol a chymunedau eu hunain i gyflawni datrysiadau cynaliadwy, nid atebion byrdymor. 

"Rydym wedi meithrin dealltwriaeth fanwl o'r materion y mae pobl am i ni eu blaenoriaethu, a'r safonau gwasanaeth y maent yn eu disgwyl. Byddwn yn parhau i wrando, gweithredu ar adborth, a sicrhau bod pob adroddiad o ymddygiad gwrthgymdeithasol yn cael ymateb cyson, cymesur, sy'n canolbwyntio ar y dioddefwr.” 

Nod Gwarant Plismona yn y Gymdogaeth Llywodraeth y DU, a lansiwyd fel rhan o'r Genhadaeth Strydoedd Mwy Diogel, yw magu hyder y cyhoedd ym maes plismona a gwella capasiti a gallu'r gweithlu plismona yn y gymdogaeth i atal trosedd ac ymddygiad gwrthgymdeithasol. 

Mae'r cynllun newydd yn amlinellu difrifoldeb y broblem ymddygiad gwrthgymdeithasol yn Ne Cymru, ac mae'n nodi'n fanwl sut y bydd yr heddlu’n cydweithio â phartneriaid i ddatrys problemau a chyflawni newid cynaliadwy. 

Dywedodd Comisiynydd yr Heddlu a Throseddu, Emma Wools: “Mae'r cynllun hwn yn atgyfnerthu fy ymrwymiad i roi dioddefwyr yn gyntaf, cryfhau hyder y cyhoedd a sicrhau bod plismona yn y gymdogaeth yn parhau i fod yn weladwy ac yn hygyrch. Mae a wnelo â bod yn glir na fydd ymddygiad gwrthgymdeithasol yn cael ei anwybyddu a bod cymunedau ledled De Cymru yn haeddu teimlo'n ddiogel yn eu bywydau pob dydd. 

“Mae ein huchelgais yn syml: strydoedd mwy diogel, cymdogaethau cryfach a De Cymru lle gall pawb fyw heb ofn ac yn hyderus yn y gwasanaethau sy'n bodoli i'w diogelu.”