Chwe aelod o grŵp troseddu cyfundrefnol wedi'u carcharu am dros 150 mlynedd am lofruddiaeth

Mae chwech o bobl wedi cael eu carcharu am lofruddio menyw yn Nhonysguboriau, yn y ddedfryd fwyaf ar gyfer llofruddiaeth a welwyd erioed yng Nghymru.

Ar y cyfan, cafodd y grŵp eu carcharu am o leiaf 157 o flynyddoedd, yn dilyn sesiwn ddedfrydu a barodd ddau ddiwrnod yn Llys y Goron Caerdydd.

Clywodd y llys sut, ar 9 Mawrth 2025 am 6.10pm, cafodd yr Heddlu eu galw i aelwyd yn Llys Illtyd, Tonysguboriau, lle cafodd dynes – Joanne Penney, 40 oed – ei hanafu'n ddifrifol ar ôl cael ei saethu i'r frest. Er gwaethaf ymdrechion gorau'r gwasanaethau brys, bu farw yn y fan a'r lle.

Yn ystod yr ymchwiliad dilynol, darganfu Heddlu De Cymru fod dau gar – Nissan Note a Volvo XC40 – wedi teithio o ardal Caerlŷr rywbryd ar ôl 10.30am ddydd Sul 9 Mawrth, i dde Cymru cyn gadael ychydig ar ôl y digwyddiad.

Roedd y ceir hyn yn gysylltiedig â grŵp troseddau cyfundrefnol a oedd yn delio cyffuriau yn ardal Tonysguboriau. Bu farw Joanne Penney o ganlyniad i ymryson yn ymwneud â chyffuriau rhwng grwpiau troseddau cyfundrefnol o Gaerlŷr a de Cymru.

Gwnaeth ymchwiliad helaeth gan dîm Troseddau Mawr Heddlu De Cymru ganfod cyfanswm o 12 o bobl sydd wedi'u dyfarnu'n euog mewn cysylltiad, y cafwyd chwech ohonynt yn euog o lofruddiaeth ac fe'u dedfrydwyd heddiw.

Roedd Marcus Huntley, 21 oed, o Llaneirwg, Caerdydd, eisoes wedi pledio'n euog i lofruddiaeth a chymryd rhan yng ngweithgareddau grŵp cyfundrefnol a chafodd ef ei ddedfrydu i'r carchar am ei oes gydag isafswm o 30 o flynyddoedd a 146 dydd, a dau o flynyddoedd a pump mis yn y carchar i'w treulio ar yr un pryd.

Cafodd Renaldo Baptiste, 39 oed o Lundain, ddedfryd am oes gydag isafswm o 42 o flynyddoedd am lofruddiaeth ar ôl y cafwyd ef yn euog. Roedd ef hefyd wedi pledio'n euog o'r blaen i gymryd rhan yng ngweithgareddau troseddol grŵp troseddau cyfundrefnol; am hyn fe'i dedfrydwyd i dau o flynyddoedd a 10 mis yn y carchar i'w treulio ar yr un pryd.

Dedfrydwyd Kistina Ginova, 23 oed o Swydd Gaerlŷr, i'r carchar am oes gydag isafswm o 10 mis am lofruddiaeth a 12 o flynyddoedd i'w treulio ar yr un pryd am gymryd rhan yng ngweithgareddau troseddol grŵp troseddau cyfundrefnol ar ôl y cafwyd hithau'n euog.

Dedfrydwyd Melissa Quailey-Dashper, 40 oed, o Gaerlŷr, i'r carchar am oes gydag isafswm o 14 o flynyddoedd am lofruddiaeth a 22 mis o flynyddoedd i'w treulio ar yr un pryd am gymryd rhan yng ngweithgareddau troseddol grŵp troseddau cyfundrefnol ar ôl y cafwyd hithau'n euog.

Cafodd Jordan Mills-Smith, 33 oed, o Gaerdydd ei ddedfrydu i'r carchar am oes gydag isafswm o 27 o flynyddoedd am lofruddiaeth ar ôl y cafwyd ef yn euog. Roedd ef hefyd wedi pledio'n euog o'r blaen i gymryd rhan yng ngweithgareddau troseddol grŵp troseddau cyfundrefnol; am hyn fe'i dedfrydwyd i dau o flynyddoedd a tri mis yn y carchar i'w treulio ar yr un pryd/yn olynol.

Cafodd Joshua Gordon, 27 oed, o Swydd Gaerlŷr, ei ddedfrydu i'r carchar am oes gydag isafswm o 32 o flynyddoedd am lofruddiaeth a 3 o flynyddoedd a 10 mis i'w treulio'n olynol/ar yr un pryd am gymryd rhan yng ngweithgareddau troseddol grŵp troseddau cyfundrefnol ar ôl y cafwyd ef yn euog.

Mae'r teulu wedi rhyddhau'r datganiad canlynol:

"Mae colli Joanne wedi cael effaith aruthrol arnon ni fel teulu, ac rydyn ni'n parhau i fyw gyda hynny. Roedd yr achos o saethu a gymerodd ei bywyd oddi wrthym yn ddisynnwyr.
"Mae'r golled wedi gadael bwlch yn ein teulu ni am byth, ac wedi’i cholli hi fe fyddwn ni'n cario’r boen gyda ni bob dydd.
"Does dim byd sy'n gallu gwneud iawn am yr hyn sydd wedi cael ei gymryd oddi wrthym, na dod â Joanne yn ôl at ei hanwyliaid. 
"Roedd Joanne yn ferch, yn fam, yn chwaer ac yn nith, ac roedd pawb a oedd yn ei hadnabod yn ei charu. Ni fydd ei charedigrwydd, ei chryfder, a'i chariad at ei theulu byth yn mynd yn angof.
"Hoffem ddiolch i'r heddlu am eu proffesiynoldeb, eu hymroddiad a'u cefnogaeth drwy gydol yr ymchwiliad hwn. Rydym wedi gwerthfawrogi eu hymdrechion yn fawr iawn drwy'r cyfnod anodd hwn."

Dywedodd y Ditectif Brif Arolygydd Lianne Rees:

"Mae ein meddyliau'n aros yn ddiwyro gyda theulu Joanne, sydd wedi dangos cryfder ac urddas eithriadol yn wyneb colled anhygoel. Cymerwyd bywyd Joanne mewn gweithred ddidrugaredd o drais, ac ni all unrhyw beth waredu'r boen y mae ei hanwyliaid yn ei theimlo o hyd.
"Mae'r achos hwn yn amlygu canlyniadau dinistriol troseddau cyfundrefnol. Gwnaeth y rhai hynny sy'n gyfrifol ddiystyru bywyd dynol a diogelwch ein cymunedau yn gyfan gwbl. Dyma rybudd plaen yn sgîl y ddedfryd hon - os byddwch chi'n dod â thrais, cyffuriau ac arfau tanio i dde Cymru, byddwn ni'n eich erlid yn ddi-baid, yn chwalu eich rhwydweithiau ac yn sicrhau eich bod yn wynebu holl ganlyniadau eich gweithredoedd.
"Hoffwn ddiolch i'r swyddogion a'r staff sydd wedi bod yn rhan o'r ymchwiliad hwn, ochr yn ochr â chydweithwyr o Wasanaeth Erlyn y Goron a'r cwnsler erlyn. Mae eu proffesiynoldeb, eu penderfyniad a'u ffocws wedi bod yn hanfodol wrth sicrhau cyfiawnder i Joanne a'i theulu.
"Rydym wedi ymrwymo i weithio'n ddiflino i amddiffyn ein cymunedau ac i ddal y rhai hynny sy'n gyfrifol am drais difrifol i gyfrif yn llawn."