Carcharu dyn am 16 mlynedd ar ôl treisio ac ymosod mewn modd ffiaidd a threisgar

Mae dyn o Abertawe wedi cael ei garcharu am dreisio ac ymosod ar fenyw, yn ogystal â dwyn ei chi.

Gwnaeth Dominik Szymanski, 47 oed o Waun Wen, ddyrnu, cicio a llusgo'r dioddefwr pan wrthododd gael rhyw gydag ef yn ei fflat ar Stryd Matthew ar 2 Medi 2025.

Roedd wedi cwrdd â'r dioddefwr am y tro cyntaf yn gynharach y diwrnod hwnnw.

Cafwyd Szymanski yn euog o dreisio, ymosod gan achosi gwir niwed corfforol a dwyn ym mis Mai.

Mae wedi cael ei ddedfrydu heddiw i 16 o flynyddoedd yn y carchar. Bydd ei enw ar y gofrestr troseddwyr rhyw am oes.

Dywedodd y Ditectif Gwnstabl Claire Davies:

"Roedd hwn yn ymosodiad hir ac arwyddocaol gan droseddwr gwirioneddol ffiaidd yn erbyn menyw a oedd yn agored i niwed nad oedd ganddi fawr ddim modd o amddiffyn ei hun.

"Mae'r ddedfryd hon yn anfon neges hynod gadarnhaol i ddioddefwyr cam-drin rhywiol y byddant yn cael eu credu, y bydd eu hymosodwyr yn cael eu canfod, ac y byddant yn cael eu dwyn i gyfrif.

Er nad yw'r dioddefwr bellach yn gallu gweld ei bod wedi cael cyfiawnder yn y llys, mae'r canlyniad hwn yn rhyddhad mawr i'w theulu a'i ffrindiau; maen nhw wedi gweld Dominik Szymanski yn cael ei ddwyn yn atebol am ei weithredoedd a'i gosbi'n briodol."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Mae cyfoeth o wybodaeth a manylion am wasanaethau cymorth ar gael yma.