Carchar i fenyw o Lanelli am gyflawni troseddau treisgar ar ôl cymryd cyffuriau

Mae menyw o Sir Gaerfyrddin wedi cael ei charcharu ar ôl iddi gyflawni cyfres o droseddau yn erbyn yr un dioddefwr mewn diwrnod tra oedd hi dan ddylanwad cyffuriau Dosbarth A.

Fe gyfaddefodd Elizabeth Jones, 26 oed o Lanelli, ei bod wedi defnyddio crac cocên yn ystod y dyddiau cyn iddi gyflawni'r troseddau. Roedd y troseddau dan sylw yn cynnwys bygythiadau i ladd, ymosodiad gan achosi gwir niwed corfforol, tagu bwriadol a difrod troseddol i eiddo gwerth llai na £5,000.

Plediodd Jones yn euog i bob un o'r troseddau hyn a gyflawnwyd mewn cyfeiriad ym Mhontarddulais ar 1 Mai. Plediodd yn euog i ymosod ar gwnstabl a oedd yn cyflawni ei ddyletswydd hefyd.

Mae hi wedi cael ei dedfrydu i gyfanswm o dair blynedd a hanner yn y carchar.

Dywedodd y Ditectif Ringyll James Llewellyn:

“Roedd ymddygiad Elizabeth Jones yn gwbl afreolus, a chyflawnodd y troseddau hyn o ganlyniad i ddefnyddio swm mawr o gyffuriau Dosbarth A dros gyfnod o sawl diwrnod.

“Dyma enghraifft nodweddiadol o pam mae defnyddio cyffuriau yn anghyfreithlon. Mae'n debygol iawn na fyddai dim o hyn wedi digwydd pe na bai Jones dan ddylanwad cyffuriau.

“Ond fe ddigwyddodd – ac mae Jones wedi cyfaddef i gyflawni’r troseddau hyn yn y llys. Bydd hi nawr yn difaru ei henaid, gan ei bod wedi colli blynyddoedd o’i rhyddid yn sgil ei gweithredoedd.”