A48 wrth y 'Tumble': yr Heddlu'n apelio a'r teulu'n talu teyrnged

Mae Heddlu De Cymru yn parhau â'i ymchwiliad i'r gwrthdrawiad traffig ffyrdd angheuol ar yr A48, y 'Tumble', Sain Nicolas, Caerdydd, tua 8pm ddydd Sadwrn 6 Mehefin.

Roedd dau gar yn rhan o'r gwrthdrawiad, sef MG llwyd a Land Rover Defender du.

Er gwaethaf ymdrechion gorau'r gwasanaethau brys, bu farw dyn 18 oed yn y fan a'r lle. Gallwn gadarnhau mai Dominic Luke Bailey o Gaerdydd yw ei enw.

Cafodd gyrrwr y Land Rover a'r cyd-deithiwr eu cludo i'r ysbyty lle maen nhw'n aros o hyd.

Mae teulu Dominic wedi talu teyrnged fel a ganlyn:

"Roedd Dominic yn gorffen ei arholiadau Safon Uwch yn Ysgol Uwchradd Esgob Llandaf lle roedd wedi bod yn ddisgybl am y saith mlynedd diwethaf. Roedd wedi cael cynnig lle ym Mhrifysgol Malaysia ond penderfynodd ddilyn ei freuddwydion o weld y byd a mynd i deithio yn lle hynny.

"Doedd neb tebyg i Dominic. Gallai roi gwên ar wyneb unrhyw un. Roedd yn ddyn ifanc mor glyfar a oedd â'i fywyd cyfan o'i flaen.

"Mae teulu Dominic wedi'u llorio ac yn dweud na fydd bywyd byth yr un fath eto hebddo."

Mae'r Uned Ymchwilio i Wrthdrawiadau Difrifol yn apelio ar unrhyw dystion a welodd y gwrthdrawiad neu a welodd y ffordd yr oedd y naill gar neu'r llall yn cael ei yrru cyn y gwrthdrawiad i gysylltu â nhw. Maent yn annog unrhyw un a oedd yn teithio drwy'r ardal ar y pryd i wirio eu camerâu borden flaen a'u teledu cylch cyfyng preifat am luniau perthnasol.

Anogir unrhyw un sydd â gwybodaeth i gysylltu â Heddlu De Cymru - dyfynnwch y cyfeirnod 2600177729.