"Teimlaf ryddhad bod cyfiawnder wedi'i weinyddu, a bod y rheithgor wedi fy nghredu yn y llys. Dw i am symud ymlaen gyda fy mywyd yn awr."

Mae Liam Hobbs, 27, o Drelái, Caerdydd, wedi cael ei garcharu yn Llys y Goron Caerdydd am ymosod yn rhywiol ar blentyn sawl gwaith yn y gorffennol.

Daeth ei droseddau i'r amlwg ar ôl i'w ddioddefwr roi gwybod am yr hyn oedd wedi digwydd.

Cafodd Hobbs ei arestio ac atafaelwyd ei ffôn symudol a dyfeisiau eraill er mwyn eu harchwilio. Darganfuwyd lluniau anweddus o blant ac fe'i harestiwyd eto.

Cyfaddefodd Hobbs i dri chyhuddiad o greu lluniau anweddus ond gwadodd ddau gyhuddiad o ymosod ar ferch dan 13 oed drwy dreiddio.

Fe'i cafwyd yn euog gan reithgor ar 1 Gorffennaf yn dilyn treial yn Llys y Goron Caerdydd a chafodd ei ddedfrydu ar 2 Medi i 14 mis yn y carchar am droseddau creu lluniau anweddus.

Cafodd ddedfryd estynedig o saith mlynedd i'w threulio'n olynol am yr ymosodiadau rhywiol, sy'n cynnwys 5 mlynedd o garchar a chyfnod estynedig o ddwy flynedd ar drwydded.

Yn ei datganiad am yr effaith arni, dywedodd y dioddefwr: "Teimlaf ryddhad bod cyfiawnder wedi'i weinyddu, a bod y rheithgor wedi fy nghredu yn y llys. Dw i am symud ymlaen gyda fy mywyd yn awr."

Dywedodd y swyddog a fu'n ymwneud â'r achos, y Ditectif Gwnstabl Emma Partridge o Heddlu De Cymru: "Roedd y dioddefwr yn hynod o ddewr yn rhannu'r hyn a ddigwyddodd iddi a chynorthwyo'r ymchwiliad.

"Rhoddwyd tystiolaeth gymhellol yn y llys ac fe ddylai deimlo'n falch ohoni ei hun.

"Mae gweithredoedd Hobb yn cael effaith enfawr ar ei bywyd o hyd, gan ei bod yn dioddef o byliau o banig ac yn ei chael hi’n anodd cysgu.

"Gobeithio y bydd y ddedfryd hon yn rhoi rhywfaint o gysur iddi ac yn ei helpu i fagu’r hyder i symud ymlaen."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.