Carcharu dyn o'r Rhondda am ymosodiad rhywiol

Mae dyn wedi cael ei garcharu am nifer o droseddau rhywiol yn dilyn ymchwiliad gan Heddlu De Cymru

Cafodd Andrew Bennison, 44 oed o Bentre'r Eglwys, Rhondda Cynon Taf, ei ddedfrydu i 13 mlynedd yn y carchar yn dilyn ei euogfarn. Mae hefyd wedi cael Gorchymyn Atal a Gorchymyn Atal Niwed Rhywiol fydd yn para am gyfnod o 15 mlynedd o heddiw. Bydd ei enw ar y gofrestr Troseddwyr Rhyw am oes.

Cafodd ei ddedfrydu ddydd Iau 7 Medi yn Llys y Goron Caerdydd, yn dilyn treial wythnos o hyd ym mis Awst 2026 lle cafwyd Bennison yn euog o bedwar cyhuddiad o achosi i fenyw gymryd rhan mewn gweithgarwch rhywiol, wyth cyhuddiad o ymosodiad rhywiol a dau gyhuddiad o ymosod ar fenyw drwy dreiddio â rhan o’r corff.

Rhoddodd y dioddefwr wybod i'r heddlu am y troseddau ym mis Ebrill 2024. Ar ôl ymchwilio i'r achos, canfu swyddogion fod Bennison wedi bod yn cam-drin y dioddefwr dros gyfnod o saith mlynedd.

Dywedodd y Ditectif Gwnstabl Bethan Crisfield: "Ni ellir diystyru’r dewrder sydd ei angen i gysylltu a rhoi gwybod i ni am droseddau fel hyn.

“Rydym yn gobeithio y bydd y ddedfryd hon yn helpu'r dioddefwr i ailadeiladu ei bywyd a gwella ar ôl y digwyddiadau erchyll hyn. Rydw i am ddiolch iddi am ddangos cryfder ac urddas drwy gydol yr ymchwiliad.

“Gwnaed gwaith sylweddol ar yr ymchwiliad hwn, ac mae’r ddedfryd a roddwyd yn anfon neges hynod gadarnhaol i ddioddefwyr cam-drin rhywiol y byddant yn cael eu credu, y bydd eu hymosodwyr yn cael eu hadnabod, ac y byddant yn cael eu dwyn i gyfrif”.