Dedfrydu treisiwr i dair blynedd yn y carchar

Mae dyn o Ben-y-bont ar Ogwr wedi cael ei garcharu ar ôl cyflawni troseddau rhywiol yn erbyn ei ddioddefwr.

Gwnaeth Daffydd Piper, 21 oed o Ben-y-bont ar Ogwr, newid ei ble o ddieuog i euog o un cyhuddiad o dreisio pan ymddangosodd gerbron Llys y Goron Caerdydd ddydd Gwener 24 Gorffennaf.

Yn ystod y gwrandawiad dedfrydu yn Llys y Goron Caerdydd ddydd Llun 21 Medi, cafodd Piper ei ddedfrydu i dair blynedd a phum mis yn y carchar. Hefyd cafodd orchymyn atal am bum mlynedd.

Dywedodd y Ditectif Gwnstabl Lucy Weaver: "Ni ellir diystyru’r dewrder sydd ei angen i gysylltu â ni a rhoi gwybod am droseddau o'r fath.

“Rydym yn gobeithio y bydd y ddedfryd hon yn helpu'r dioddefwr i ailadeiladu ei bywyd a gwella ar ôl y digwyddiadau erchyll hyn.

"Bu llawer iawn o waith fel rhan o'r ymchwiliad hwn ac yn sgîl hyn credwn nad oedd opsiwn arall gan Piper heblaw pledio'n euog ac felly atal y dioddefwr rhag gorfod rhoi tystiolaeth yn y llys."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.