Dyn wedi'i gael yn euog o lofruddiaeth Tracey Davies
Cynnwys y prif erthygl
Heddiw, cafwyd Michael Davies, 57, o Ffordd Cefn, Pen-y-bont ar Ogwr, yn euog o lofruddiaeth ar ôl lladd ei wraig Tracey Davies yn anghyfreithlon ar 18 Ebrill 2025.
Ar 18 Ebrill gyda'r hwyr, ychydig cyn 9.20pm, cafodd Heddlu De Cymru alwad frys gan aelod o'r teulu a oedd wedi mynd i holi ynghylch y cwpl ar ôl peidio â chael cyswllt am 24 awr. Ar ôl mynd i mewn i'w cartref ar Deras Bryn, Cefn Cribwr, darganfu'r galwr fod Tracey Davies wedi marw yn yr ystafell wely, a bod Michael Davies yn anymwybodol a chanddo anafiadau trywanu.
Cyrhaeddodd y gwasanaethau brys yn gyflym a chadarnhawyd bod Tracey Davies wedi marw. Cafodd Michael Davies ei gludo i'r ysbyty ac yna cafodd ei arestio ar amheuaeth o lofruddiaeth. Cynhaliwyd post-mortem a ddaeth i'r casgliad bod Mrs Davies wedi marw o ganlyniad i dagu. Cafodd Mr Davies ei ryddhau o'r ysbyty wythnos yn ddiweddarach ac yn ystod ei gyfweliad â'r heddlu cyfaddefodd ei fod wedi tagu ei wraig Tracey Davies ond ni roddodd unrhyw esboniad pam. Yna dywedodd ei fod wedi cymryd gorddos cyn trywanu ei hun.
Yn ystod yr ymchwiliad, datgelwyd bod Michael Davies, a oedd yn gweithio i ffwrdd yn Abu Dabi, wedi dychwelyd adref i Gefn Cribwr oherwydd ei iechyd meddwl gwael. Dywedodd ei fod yn teimlo'n ansicr, yn genfigennus ac yn baranoiaidd y gallai ei wraig ei adael.
Plediodd Michael Davies yn euog i ddynladdiad ar sail cyfrifoldeb lleiedig, ar ôl cael ei asesu fel un oedd yn dioddef o anhwylder iselder a gorbryder ar adeg y drosedd. Clywodd y rheithgor dystiolaeth gan dri seiciatrydd fforensig a oedd wedi asesu Mr Davies yn yr achos hwn. Ar ôl trafod yr holl dystiolaeth, penderfynwyd nad oedd ganddo'r amddiffyniad o gyfrifoldeb lleiedig a chafwyd dyfarniad euog am y cyhuddiad o lofruddiaeth.
Bydd Michael Davies yn cael ei ddedfrydu yn ddiweddarach yn y flwyddyn.
Dywedodd y Ditectif Brif Arolygydd Claire Lamerton o Heddlu De Cymru: "Dyma achos ofnadwy sydd wedi effeithio'n ddwfn ar y teulu agos a hefyd ar y gymuned ehangach a oedd yn adnabod Tracey Davies. Yn ystod y treial tynnwyd sylw at y ffaith bod Tracey Davies yn wraig, yn fam, yn llysfam ac yn llys-nain ymroddedig, y byddai hi'n gwneud unrhyw beth i unrhyw un ac roedd hi'n wraig gefnogol a chariadus i Mr Davies. Rydym yn cynnig ein cydymdeimlad diffuant i deulu Tracey a phawb sydd wedi teimlo effaith yn sgîl hyn. Gobeithio hefyd y bydd y dyfarniad hwn yn rhoi cyfle i'r teulu alaru am golli Tracey.
Nid oedd digwyddiadau 18 Ebrill a llofruddiaeth Tracey Davies wedi'u rhagweld. Mae'n hanfodol ein bod yn parhau i godi ymwybyddiaeth am iechyd meddwl a thrais domestig, gan sicrhau bod unigolion yn cael mynediad at y cymorth sydd ei angen arnynt."
Os ydych chi neu rywun rydych chi'n ei adnabod yn cael trafferth, gallwch gael cymorth drwy gysylltu â gwasanaethau lleol neu linellau cymorth."
Mae teulu Tracey wedi talu'r deyrnged ganlynol iddi "Fel teulu, nid ydym wedi dod i delerau â cholli Tracey, ac ni fyddwn byth yn dod i delerau â hynny.
Drwy ei cholli mewn ffordd mor ofnadwy a threisgar, mae'n gwaethygu'r boen rydym yn ei theimlo.
Artaith lwyr oedd clywed y manylion graffig o sut y cafodd ei lladd gan y person yr oedd hi'n ei garu.
Ni waeth pa mor hir fydd y ddedfryd i Michael yn dilyn y dyfarniad heddiw, ni fydd yn dod â Tracey yn ôl.
Beth bynnag fo'r ddedfryd iddo fe, ni fydd yn gyffelyb i'r gosb i ni fel teulu sy'n gorfod byw heb Tracey.
Roedd gan Tracey angerdd am fywyd a'i theulu; roedd hi wedi gwneud cynifer o gynlluniau ar gyfer ei dyfodol a'i bywyd. Bywyd a ddaeth i ben mewn ffordd greulon a chiaidd dan ddwylo'r dyn roedd hi'n ei garu.
Bu Tracey yn caru ac yn gofalu am Michael Davies, hyd yn oed yn ei dyddiau olaf dangosodd y cariad a'r gofal hwn. Mae hyn yn cadarnhau eto y person gofalgar a meddylgar yr oedd hi, a dyma sut bydd hi'n cael ei chofio.
Roedd Tracey yn fenyw wirioneddol anhygoel; roedd ganddi ysbryd brwd a thosturi diderfyn.
Roedd hi'n fam ymroddedig, yn chwaer annwyl, yn ffrind ffyddlon, yn gefnder gariadus ac yn fodryb ac yn bresenoldeb gwirioneddol ddisglair a oedd yn gallu goleuo unrhyw ystafell â'i chwerthin.
Ei phlant oedd ei balchder mwyaf, ac ymladdodd hi drostyn nhw ag ymroddiad digyffelyb. Rydym yn caru ac yn hiraethu gymaint am Tracey. Byddwn ni bob amser yn ei chofio."