Heddlu De Cymru yn nodi Diwrnod Coffa Cenedlaethol yr Heddlu

Heddiw, fel rhan o Ddiwrnod Coffa Cenedlaethol yr Heddlu, ymunodd cydweithwyr â gwasanaeth byr ym Mhencadlys yr Heddlu ym Mhen-y-bont ar Ogwr i gofio swyddogion heddlu sydd wedi marw wrth wasanaethu ledled y Deyrnas Unedig.

Arweiniwyd y gwasanaeth gan y Prif Gwnstabl Jeremy Vaughan, a ymunodd hefyd â Gwasanaeth Diwrnod Coffa Cenedlaethol yr Heddlu yn Belfast ddydd Sul, lle daeth cynrychiolwyr o heddluoedd ledled y Deyrnas Unedig at ei gilydd i anrhydeddu swyddogion a gollodd eu bywydau wrth wasanaethu eu cymunedau.

Yn ystod y gwasanaeth, dywedodd y Prif Gwnstabl wrth gydweithwyr:

"Mae Diwrnod Coffa Cenedlaethol yr Heddlu yn ein hatgoffa bod pob un sy'n gwasanaethu yn berson sy'n cael ei garu a'i werthfawrogi'n fawr.

"Mae'r rheini rydym yn eu cofio heddiw yn fwy na swyddogion heddlu; roedden nhw'n rhieni, yn bartneriaid, yn blant, yn frodyr ac yn chwiorydd, yn ffrindiau ac yn gydweithwyr.

"Mae pawb a oedd yn eu hadnabod yn teimlo eu habsenoldeb o hyd, ac mae ein meddyliau yn parhau gyda'r teuluoedd y newidiwyd eu bywydau am byth."

Mae Diwrnod Coffa Cenedlaethol yr Heddlu yn gyfle i fyfyrio ar ymroddiad, dewrder ac aberth y rheini sydd wedi gwasanaethu ym maes plismona, ac i gofio'r rhai hynny a roddodd eu bywydau wrth wasanaethu.

Yn ystod y gwasanaeth, bu munud o dawelwch ymysg cydweithwyr er cof am swyddogion heddlu sydd wedi marw wrth wasanaethu ledled y Deyrnas Unedig.

Ni chaiff eu gwasanaeth a'u haberth fyth eu hanghofio.