Carcharu lleidr car ar ôl i Dîm Plismona'r Ffyrdd ei stopio

Mae dyn wedi cael ei garcharu ar ôl ymchwiliad gan Heddlu De Cymru i ddau gar wedi'u dwyn, a throseddau lladrad eraill.

Dedfrydwyd Liam McDonald, 35 oed, heb breswylfa sefydlog, i 91 wythnos (blwyddyn a naw mis) ar 4 Medi yn Llys y Goron Caerdydd.

Mae hefyd wedi'i wahardd rhag gyrru am dair mlynedd.

Roedd McDonald wedi pledio'n euog o'r blaen i:

• Gymryd cerbydau gwaethygedig a gyrru'n beryglus
• Cymryd cerbyd modur heb ganiatâd y perchennog
• Dau gyhuddiad o yrru tra roedd wedi'i wahardd
• Defnyddio cerbyd modur ar ffordd/mewn man gyhoeddus heb yswiriant trydydd parti
• Dau gyhuddiad o ddwyn o gerbyd modur
• Dau gyhuddiad o ddwyn o siop

Clywodd y llys sut dechreuodd McDonald ei gyfres o droseddau ar 8 Gorffennaf, pan wnaeth ddwyn pum jar o goffi o B&M yn Lecwydd.

Ddau ddiwrnod yn ddiweddarach, ar 10 Gorffennaf, riportiwyd bod car wedi'i ddwyn o gyfeiriad yng Nghaerdydd. Yn dilyn ymholiadau teledu cylch cyfyng, gwnaeth y swyddog ymchwilio ganfod bod dyn ar feic – y gwyddom bellach mai McDonald ydoedd – yn gyfrifol am ddwyn y car. Daethpwyd o hyd i'r car ddau ddiwrnod yn ddiweddarach wedi'i adael rhwng Heol Sloper a Heol Lecwydd.

Ar 21 Gorffennaf, gwnaeth McDonald ddwyn dwy botel o wisgi gwerth £119 o Waitrose ym Mhontprennau.

Daeth gweithgareddau McDonald's i ben ar 27 Gorffennaf, yn dilyn galwad 999 yn riportio bod car newydd gael ei ddwyn. Roedd swyddogion plismona'r ffyrdd yn cynnal chwiliad o'r ardal am y car wedi'i ddwyn pan gafodd ei weld yn gyrru tua chyfeiriad y swyddogion.

Wrth weld y swyddogion, gyrrodd McDonald i ffwrdd yn beryglus ac awdurdodwyd erlid. Yn y pen draw, llwyddodd swyddogion i gaethiwo'r cerbyd ac arestio McDonald yn ddiogel:

Yna cafodd ei gysylltu ymhellach â'r digwyddiadau cynharach a'i arestio mewn cysylltiad â nhw.

Dywedodd y swyddog ymchwilio PC Paul Griffiths o dîm cymdogaeth Caerdydd:

"Gwnaeth McDonald gyflawni cyfres o droseddau a gafodd effaith sylweddol ar y bobl a'r busnesau yn ei gymunedau. Hefyd gwnaeth roi pobl ar y ffordd mewn perygl y diwrnod hwnnw yn sgîl ei ffordd o yrru, a hynny heb drwydded. Rwy'n falch o weld y ddedfryd hon yn cael ei rhoi heddiw.”