Carchar i ddyn o Aberpennar yn dilyn ymlid gan yr heddlu

Daw hyn ar ôl i swyddogion ymlid car ar ffyrdd ger Abercwmboi ym mis Mai 2026.

Cafodd Jacob Roberts, 25 oed o Aberpennar, ei ddedfrydu i flwyddyn a dau fis yn y carchar ar ôl cael ei euogfarnu. Cafodd ei wahardd rhag gyrru am dair blynedd hefyd.

Dedfrydwyd Roberts yn Llys y Goron Merthyr Tudful ddydd Gwener 21 Awst lle plediodd yn euog i yrru'n beryglus, gyrru tra roedd wedi'i wahardd, gyrru heb yswiriant, gwrthod stopio ar ôl damwain ffordd, achosi difrod troseddol i eiddo (o dan £5,000) a bod â chyffuriau dosbarth B a reolir yn ei feddiant (canabis/resin canabis).

Mae'r achos yn deillio o batrolau arferol yn Abercwmboi lle'r oedd swyddogion yn gallu arogli canabis yn dod o fan. Wrth geisio stopio’r fan, gyrrodd Roberts i ffwrdd yn gyflym.

Gwelodd swyddogion fod Roberts yn gyrru'r cerbyd yn ddiofal, yn goryrru ac yn gwrthod stopio wrth gyrraedd sawl cyffordd, gan yrru dros balmentydd a pheri risg i gerddwyr. Gwnaeth Roberts fwrw’r fan yn ôl yn erbyn car heddlu ddwywaith a gwrthdaro â cheir wedi'u parcio ac adeilad wrth gael ei ymlid.

Yn y pen draw, gyrrodd Roberts i lawr stryd bengaead a gadael y car mewn ymgais i ddianc rhag yr heddlu. Ar ôl rhedeg ar ei ôl, llwyddodd swyddogion i stopio ac arestio Roberts. Wrth ei chwilio, daeth swyddogion o hyd i ddwy sigarét canabis.

Dywedodd y Cwnstabl Peter Kerswell: "Roedd Roberts eisoes wedi cael ei wahardd rhag gyrru ar adeg y troseddau hyn, ac ni ddangosodd unrhyw ystyriaeth i’r bobl eraill oedd yn defnyddio'r ffyrdd, gan gynnwys cerddwyr"

"Rwy'n gobeithio y bydd hyn yn atal pobl eraill sy'n ystyried gyrru mewn modd peryglus rhag gwneud hynny."

"Lwc oedd hi na chafodd neb ei anafu'n ddifrifol yn ystod yr ymlid hwn. Gobeithio y bydd y ddedfryd hon yn rhoi amser i Robert feddwl am ei weithredoedd."