Ymgyrch Eagle: dedfrydu wyth o bobl yn dilyn ymchwiliad i gyflenwi cyffuriau anghyfreithlon

Mae saith dyn ac un fenyw wedi cael eu dedfrydu yn dilyn ymchwiliad i nifer o unigolion allweddol ym maes cyflenwi cyffuriau anghyfreithlon, ac achosion cyfundrefnol o ddwyn cerbydau a thwyll cysylltiedig, yn Abertawe a Chastell-nedd Port Talbot.

O dan Ymgyrch Eagle, cynhaliwyd wythnos orfodi y llynedd pan atafaelwyd cyffuriau, arian parod, ffonau symudol, cerbydau ac eitemau eraill gan y tramgwyddwyr.

Atafaelwyd cyfanswm o £2,799 mewn arian parod, yn ogystal â metelau gwerthfawr (aur a phlatinwm) gwerth £5,100 yn ôl amcangyfrifon.

Atafaelwyd hefyd swm sylweddol o gyffuriau - gan gynnwys 360 gram o heroin, tua 250 gram o getamin tybiedig a symiau o gocên, canabis a thabledi - yn ogystal â deunydd pecynnu a phethau eraill yn ymwneud â chyffuriau.

 

Plediodd Sean McCabe, 33 oed, o Townhill, yn euog i gynllwynio i ddwyn cerbyd modur, cynllwynio i dwyllo, cynllwynio ynghyd ag eraill i ymwneud â chyflenwi cocên a chynllwynio i gyflenwi canabis. Mae ef wedi cael ei ddedfrydu i 11 blynedd a 6 mis o garchar.

 

Plediodd Michael Brain, 41 oed, o Waunarlwydd, Abertawe, yn euog i gynllwynio i ddwyn cerbyd modur, cynllwynio i dwyllo, meddu ar gocên, heroin a chetamin gyda'r bwriad o'u cyflenwi a chynllwynio i gyflenwi cocên. Mae ef wedi cael ei ddedfrydu i 5 blynedd a 7 mis o garchar.

 

Plediodd Joshua Pope, 33 oed, o Dreforys, Abertawe, yn euog i gynllwynio i ddwyn cerbyd modur a chynllwynio i gyflawni twyll drwy gynrychiolaeth ffug, ac mae ef wedi cael ei ddedfrydu i 5 mlynedd o garchar (2 flynedd am ddwyn cerbyd – wedi'u hychwanegu at y 3 blynedd am gyflenwi cyffuriau o'r llynedd).

 

Plediodd Daniel Bryant, 36 oed, o Waun Wen, Abertawe, yn euog i gynllwynio i ddwyn cerbyd modur ac ymwneud â chyflenwi cocên a chanabis. Mae ef wedi cael ei ddedfrydu i 4 blynedd a 5 mis o garchar.

 

Plediodd Jake Thomas, 29 oed, o Flaenymaes, yn euog i  gyflenwi heroin, cetamin, cocên a chanabis, yn ogystal â chynllwynio i ddwyn cerbyd modur. Cafodd ei ddedfrydu i bedair blynedd a thri mis yn y carchar.

Plediodd Steffan Hopkins, 27 oed, o ganol dinas Abertawe, yn euog i gynllwynio i gyflenwi canabis a meddu ar ganabis. Mae ef wedi cael ei ddedfrydu i 14 mis o garchar.

Plediodd Lindsey Martin, 31 oed, o Townhill, Abertawe, yn euog i gynllwynio i dwyllo ac mae hi wedi cael ei dedfrydu i 12 mis (wedi'u gohirio am 12 mis).

Plediodd Mumen Khan, 24 oed, o Ben-y-bont ar Ogwr, yn euog i gynllwynio i ddwyn cerbyd modur, ac mae ef wedi cael ei ddedfrydu i 22 mis (wedi'u gohirio am 2 flynedd).

Dywedodd y Ditectif Arolygydd Richard George:

"Mae hwn wedi bod yn ymchwiliad ardderchog, diolch i waith tîm rhagorol rhwng swyddogion yn Abertawe a thu hwnt, gyda chefnogaeth Ymateb Amlasiantaeth i Droseddau Cyfundrefnol Difrifol (MARSOC), yr Uned Fforenseg Ddigidol (DFU), yr Uned Fforenseg ar y Cyd (JFU) a'r Tîm Cymorth Tiriogaethol (TST), ymysg eraill.

"Rhaid talu teyrnged hefyd i waith y Timau Ymchwilio i Droseddau Cyfundrefnol Difrifol a'r Uned Gudd-wybodaeth."

Dywedodd y Prif Uwch-arolygydd, Stephen Jones:

"Yn ystod yr ymgyrch hwn, bu'r tîm ymchwilio yn gweithio oriau hir, yn galed iawn, i gyflawni'r canlyniadau gwych hyn, gan atafaelu cyffuriau ac eiddo wedi'u dwyn a'u tynnu o'r cylch troseddol.

"Mae'r arestiadau a'r dedfrydau yn ergyd enfawr i bocedi troseddwyr. Yn y pen draw, mae'r ymchwiliad hwn wedi amddiffyn y cyhoedd ac wedi diogelu ein cymuned.

"Bydd hefyd yn cael effaith o ran lleihau'r galw rheng flaen am swyddogion yn y gymdogaeth ac ymateb."