Carcharu dyn o Abertawe ar ôl darganfod gweithgarwch cyflenwi cyffuriau Dosbarth A

Mae dyn o Abertawe wedi cael ei garcharu ar ôl canfod ei fod yn rheoli llinell cyflenwi cyffuriau cocên yn y ddinas.

Cafodd Joshua Dennis, 32 oed, o Mayhill, ei arestio yn ystod gwarant yn ei gartref ar 25 Gorffennaf.

Plediodd Dennis yn euog i ymwneud â chyflenwi cocên, meddu ar gocên, a meddu ar eiddo troseddol mewn perthynas ag arian parod a ddarganfuwyd yn ei eiddo, ar 28 Awst.

Mae Dennis wedi cael ei ddedfrydu i bum mlynedd a saith mis yn y carchar, sef yr isafswm dedfryd o garchar am fasnachu cyffuriau.

Dywedodd y Ditectif Arolygydd Richard George:

"Roedd Joshua Dennis yn ffigwr allweddol mewn grŵp troseddau cyfundrefnol a oedd yn cyflenwi cyffuriau Dosbarth A i bobl agored i niwed yn Abertawe. Roedd ei ymddygiad troseddol yn niweidio ein dinas ac mae'n haeddu ei gyfnod hir yn y carchar.

"Mae Abertawe yn lle gwell a mwy diogel heb bobl fel Joshua Dennis yn rhoi cyffuriau anghyfreithlon ar ei strydoedd ac yn difetha bywydau di-ri."

Mae ymdrin â throseddau cyfundrefnol yn flaenoriaeth i Heddlu De Cymru a byddwn yn parhau i weithio’n ddiflino i ddal troseddwyr er mwyn amddiffyn cymunedau rhag niwed.

Os ydych chi’n amau bod delio cyffuriau’n digwydd neu’n pryderu efallai bod person ifanc neu blentyn neu oedolyn agored i niwed wedi cael ei dargedu gan grwp troseddau cyfundrefnol, dywedwch wrthym ni. Nid oes angen i chi fod yn bendant, dim ond yn bryderus.

Ffoniwch ni ar 101 neu os oes well gennych chi gallwch gysylltu â Crimestoppers i roi gwybod yn ddienw - ar-lein neu drwy ffonio 0800 555 111. Os yw rhywun mewn perygl ar unwaith neu os yw trosedd yn mynd rhagddi, dylech ffonio 999 bob amser.