Carcharu cwpl o Gastell-nedd Port Talbot am gam-fanteisio ar blentyn yn rhywiol

Mae dyn a menyw o Gastell-nedd Port Talbot wedi cael eu carcharu ar ôl i'r fenyw gael ei dyfarnu’n euog o gynorthwyo’r dyn i gam-fanteisio ar blentyn yn rhywiol.

Roedd Victoria Lewis, 40 oed o Gastell-nedd, wedi gwneud trefniadau i dynnu llun anweddus o'r plentyn yng nghanol 2023. Yn ystod yr un cyfnod, trefnodd daith i’r plentyn gyda'r bwriad o gam-fanteisio arni, yn ogystal â threfnu gweithred a fyddai'n gyfystyr â chyflawni trosedd o dan unrhyw un o adrannau 9-13 o’r Ddeddf Troseddau Rhywiol 2003 yn fwriadol.

Mynnodd Shaun Lewis, 40 oed o Sandfields, fod y dioddefwr yn cydymffurfio â nifer o geisiadau a gofynion rhywiol, yn uniongyrchol a thrwy Victoria Lewis.

Plediodd Victoria Lewis yn ddieuog i’r cyhuddiadau o drefnu cam-fanteisio ar blentyn 13-17 oed yn rhywiol, trefnu i rywun gyflawni’r drosedd o gymryd rhan mewn gweithgarwch rhywiol â phlentyn, a threfnu taith unigolyn arall gyda'r bwriad o gam-fanteisio ym mis Rhagfyr 2024. Fodd bynnag, fe’i cafwyd yn euog o'r tri chyhuddiad yn dilyn achos llys ym mis Ebrill eleni.

Mae Victoria Lewis wedi cael ei dedfrydu i bedair blynedd yn y carchar.

Plediodd Shaun Lewis yn euog i ddau gyhuddiad o drefnu neu hwyluso cam-fanteisio ar blentyn yn rhywiol, cyhuddiad o drefnu neu hwyluso cyflawni trosedd rhyw yn erbyn plentyn, a chyhuddiad o drefnu neu hwyluso taith unigolyn arall gyda'r bwriad o gam-fanteisio.

Mae wedi cael dedfryd o 12 mlynedd sy'n cynnwys saith mlynedd o garchar a chyfnod estynedig o bum mlynedd ar drwydded.

Bydd y ddau’n destun gofynion hysbysiad am oes.

Dywedodd y Ditectif Gwnstabl Amanda Jenkins:

“Mae hwn wedi bod yn achos arbennig o afiach lle mae Victoria Lewis wedi trefnu i blentyn gwrdd â dyn yr oedd yn gwybod y byddai'n cam-fanteisio arni’n rhywiol.”

“Mae gweithredoedd Victoria Lewis yn erchyll, ac mae’n ddychrynllyd meddwl am yr hyn mae'r plentyn wedi mynd drwyddo oherwydd Victoria Lewis.

“Allwn ni ddim canmol y dioddefwr ddigon am y dewrder a ddangosodd wrth riportio’r hyn a ddigwyddodd iddi wrth yr heddlu er mwyn sicrhau bod y fenyw warthus hon yn cael ei dwyn o flaen ei gwell - heb sôn am ran Shaun Lewis yn y troseddau hyn.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.