Carchar i ddyn o'r Gurnos am droseddau cyffuriau

Mae dyn o'r Gurnos wedi cael ei garcharu yn dilyn ymchwiliad gan Heddlu De Cymru.

Dedfrydwyd Conner Price, 26 o'r Gurnos, i dair blynedd a phedwar mis ar ôl ei euogfarn.

Cynhaliwyd y dedfrydu ddydd Gwener 18 Medi yn Llys y Goron Caerdydd lle plediodd Price yn euog i un cyhuddiad o ymwneud â chyflenwi cocên, un cyhuddiad o ymwneud â chyflenwi cocên crac, un cyhuddiad o feddu ar gocên gyda'r bwriad o'i gyflenwi, un cyhuddiad o feddu ar gocên crac gyda'r bwriad o'i gyflenwi, un cyhuddiad o gaffael/ddefnyddio eiddo troseddol, gyrru tra roedd wedi'i wahardd a gyrru heb yswiriant.

Bu hyn ar ôl i swyddogion o'r uned troseddau cyfundrefnol difrifol gynnal patrolau ym Mharc Manwerthu Cyfartha ym mis Mehefin 2026. Fe wnaeth y swyddogion adnabod Price yn gyflym wrth iddo yrru Seat Leon coch, ac yna gwnaethant gadw golwg ar Price wrth iddo ddelio cyffuriau ym maes parcio'r parc manwerthu. Fe wnaeth swyddogion arestio'r dyn a brynodd y cyffuriau a dod o hyd i ddau fag o bowdr gwyn. Fe wnaethon nhw hefyd lawrlwytho ei ffôn lle darganfuwyd sawl neges yn cynnig gwerthu cocên. Byddai'r negeseuon hyn yn cael eu cysylltu â Price yn ddiweddarach.

Yna aeth swyddogion i gartref Price a'i weld yn gadael y car Seat Leon. Pan aethant i mewn i'r eiddo dechreuodd Price daflu eitemau allan o ffenestr uchaf y tŷ. Wedi ei arestio, chwiliodd swyddogion yr eiddo a dod o hyd i sawl lwmp o ddeunydd gwyn. Ar ôl chwilio yn ei gar, daeth swyddogion o hyd i £2,000 mewn arian parod a sawl bag snap â phowdr gwyn ynddynt.

Fe wnaethant hefyd ddod o hyd i ffôn a oedd yn cysylltu Price â llinell gyffuriau a mwy na 100 o gysylltiadau yn ei ffôn yn cael negeseuon yn rheolaidd yn cynnig gwerthu cyffuriau.

Dywedodd Cwnstabl yr Heddlu Cameron Allcock:

"Roedd hon yn ymgyrch gyfanwerthol enfawr ar gyfer gwerthu cyffuriau yn rhanbarth Merthyr, a oedd wedi bod ar waith ers peth amser.
"Gwnaeth ein timau weithredu yn sgil gwybodaeth, ac mae hynny wedi arwain at anfon Price i'r carchar am gyfnod sylweddol o amser.
"Mae cyffuriau yn cael effaith enfawr ar ein cymunedau, felly mae cadw'r cyffuriau hyn oddi ar y strydoedd yn flaenoriaeth i'n timau."