Ymgyrch 'Super Saturday'

Ar un o'i ddiwrnodau plismona prysuraf y flwyddyn, bydd gan Heddlu De Cymru ragor o swyddogion yn patrolio canol ein dinasoedd a'n trefi y penwythnos hwn ar gyfer y Dydd Sadwrn Olaf (14 Mawrth).

Dydd Sadwrn Olaf yw'r enw a roddwyd yn draddodiadol i rownd olaf y Chwe Gwlad pan fydd yr holl dimau sy'n cystadlu yn chwarae ar yr un diwrnod.

Gan weithio'n agos gydag awdurdodau lleol, timau teledu cylch cyfyng, lleoliadau, staff drws, darparwyr trafnidiaeth a phartneriaid cymunedol ehangach, byddwn yn darparu ymgyrch blismona weledol iawn a fydd yn canolbwyntio ar y canlynol:

• Atal trais yn erbyn menywod a merched
• Atal a mynd i'r afael ag ymddygiad gwrthgymdeithasol
• Lleihau anhrefn a thrais sy'n gysylltiedig ag alcohol
• Diogelu pobl sy'n agored i niwed
• Helpu pawb i fwynhau noson allan ddiogel

Gall y cyhoedd disgwyl gweld mwy o swyddogion yn patrolio mewn mannau problemus y bywyd nos ym mhob rhan o ardal yr heddlu, gan gynnwys yng nghanol dinas Abertawe a Chaerdydd. Bydd canol trefi Pen-y-bont ar Ogwr, Bro Morgannwg a Rhondda Cynon Taf hefyd yn gweld mwy o swyddogion.

Bydd swyddogion yn defnyddio amrywiaeth o bwerau i ymdrin ag ymddygiad problemus yn gyflym ac yn effeithiol, gan ddefnyddio pwerau gwasgaru Adran 35 sy'n galluogi swyddogion i gyfeirio unigolion i ffwrdd o ardal lle mae eu hymddygiad yn debygol o achosi aflonyddwch, braw, gofid, trosedd neu anhrefn.

Dywedodd y Prif Arolygydd Simon Davies, sy'n arwain yr ymgyrch blismona:

“Mae'r Dydd Sadwrn Olaf bob amser yn noson fawr, a'n blaenoriaeth yw cadw pobl yn ddiogel.

“Mae Heddlu De Cymru wedi dod i'r arfer â phlismona amrywiaeth eang o ddigwyddiadau mawr, yn benodol yng Nghaerdydd, ac rydym yn falch o chwarae ein rhan wrth gadw ymwelwyr â'n trefi a'n dinasoedd yn ddiogel.

“Byddwn yn weledol iawn, yn rhagweithiol ac yn barod i ymyrryd lle mae risg o ymddygiad yn gwaethygu. Rydym am i bawb fwynhau eu hunain – ond byddwn yn ymdrin ag unrhyw un sy'n bwriadu achosi anhrefn yn gadarn.”

Gofynnwn i'r cyhoedd ein helpu drwy wneud y canlynol:

• Yfed yn gyfrifol
• Cynllunio eich taith adref
• Edrych allan am ffrindiau
• Parchu staff, swyddogion a phawb arall sy'n mwynhau'r noson.

Os byddwch yn gweld rhywbeth sy'n peri pryder i chi, ewch at swyddog yr heddlu.

Fel arall, cysylltwch â Heddlu De Cymru drwy un o'r ffyrdd canlynol.

• Ar-lein drwy https://www.south-wales.police.uk/cy-GB/riportio/riportio
• Ffonio 101 neu Crimestoppers yn ddienw ar 0800 555 111.

Ffoniwch 999 bob amser mewn argyfwng.