Carcharu dyn o Bentre am ymosodiad a rheolaeth drwy orfodaeth
Cynnwys y prif erthygl
Mae dyn o Bentre wedi cael ei garcharu am ymosodiad a rheolaeth drwy orfodaeth yn dilyn ymchwiliad gan Heddlu De Cymru.
Cafodd Daniel Batstone, 29 oed o Bentre, ei ddedfrydu i flwyddyn a chwe mis yn y carchar ar 23 Mawrth yn Llys y Goron Merthyr Tudful. Daw'r ddedfryd hon ar ôl i Batstone newid ei ble o ddieuog i euog am achos o ymddwyn mewn ffordd reolaethol a gorfodaethol, ac achos o ymosod gan achosi gwir niwed corfforol.
Aeth swyddogion i gyfeiriad ym Mhentre ym mis Awst 2025 ar ôl iddynt gael galwad 999 yn rhoi gwybod am aflonyddwch. Pan gyrhaeddon nhw, datgelodd y dioddefwr fod Batstone wedi bod yn rheoli rhannau o'i bywyd ers 2022.
Cafodd y gweithredoedd hyn effeithiau difrifol ar fywyd y dioddefwr ac, ar sawl achlysur, roedd hi'n ofni am ei diogelwch oherwydd bygythiadau a gweithredoedd treisgar Batstone.
Roedd enghreifftiau o’r trais yn cynnwys cicio'r dioddefwr yn ei stumog yn 2022 pan oedd yn feichiog, a'i dyrnu yn ei hwyneb ym mis Awst 2025.
Dywedodd y Ditectif Gwnstabl Jack Such: “Byddai hyn wedi bod yn brofiad brawychus a dychrynllyd i'r dioddefwr. Roedd ymddygiad Batstone yn gwbl annerbyniol, ac nid oes lle i drais yn erbyn menywod a merched yn ein cymunedau.
Hoffwn ganmol y dioddefwr yn yr achos hwn am ei hamynedd, ei dewrder a'i gwroldeb tra roedd yr ymchwiliad yn mynd yn ei flaen. Gobeithio y bydd y ddedfryd hon a’r ffaith y bydd yn treulio cyfnod yn y carchar yn dod â rhywfaint o gysur iddi."
