Dyn wedi'i garcharu fis ar ôl i swyddogion ddarganfod eiddo llawn planhigion canabis yn y Porth

Y mis diwethaf, daeth Heddlu De Cymru o hyd i ffatri ganabis mewn eiddo yn y Porth. Y mis hwn, mae dyn wedi cael ei garcharu.

Cafodd Kamber Murrja, 24 oed o Heston, ei ddedfrydu heddiw (2 Ebrill) yn Llys y Goron Merthyr Tudful i 30 wythnos o garchar ar ôl i'r heddlu ddarganfod 400 o blanhigion canabis mewn adeilad yn y Porth.

Mae hyn yn dilyn ple euog yn Llys Ynadon Merthyr ar 27 Chwefror.

Derbyniodd swyddogion adroddiad gan asiantaeth gosod yr eiddo yn rhoi gwybod am wifrau amheus y tu allan i'r adeilad, gan ddweud hefyd nad oedd y rhent wedi cael ei dalu. Cafodd swyddogion eu galw i'r cyfeiriad ar 25 Chwefror.

Ar ôl chwilio’r eiddo, daeth swyddogion o hyd i 400 o blanhigion canabis a oedd yn rhan o gnwd canabis mawr.

Roedd gweithredwyr drôn yn bresennol hefyd, a gwnaethant sylwi bod dyn wedi dringo allan o'r ffenestr gefn a dechrau symud i gyfeiriad glan yr afon. Ar ôl ceisio mynd i mewn i'r afon i osgoi cael ei arestio i ddechrau, ildiodd Murrja ei hunan i’r swyddogion ac fe'i harestiwyd ar amheuaeth o dyfu canabis.

Dywedodd Cwnstabl yr Heddlu Dylan Baldwin:

“Drwy barhau i darfu ar y llinellau cyflenwi hyn a'u chwalu, gallwn ni wneud cymunedau De Cymru yn lle mwy diogel.

“Gyda chymorth ein gweithredwyr dronau, gwnaethon ni lwyddo i ddod o hyd i Murrja yn gyflym iawn a'i ddwyn i gyfrif. Bydd nawr yn treulio cyfnod sylweddol yn y carchar.”