Gwrthdrawiad Traffig Ffyrdd Angheuol ar Heol Penarth: Apêl am dystion

Mae Heddlu De Cymru yn parhau i ymchwilio i wrthdrawiad traffig ffyrdd angheuol a ddigwyddodd ar y gyffordd rhwng Heol Penarth a Heol Clare, Grangetown, ddydd Mercher 25 Mawrth 2026 am 12:27pm.

Roedd y gwrthdrawiad rhwng cerbyd SsangYong Tivoli coch a beic.

Er gwaethaf ymdrechion y gwasanaethau brys, bu farw bachgen 16 oed o Grangetown a oedd ar y beic yn y fan a'r lle - mae ei deulu yn cael eu cefnogi gan swyddogion cyswllt â theuluoedd arbenigol.

Mae gyrrwr y SsangYong Tivoli yn cynorthwyo swyddogion gyda'u hymholiadau.

Dywedodd y Ditectif Sarjant Debbie Hobrough, sydd yn arwain yr ymchwiliad : “Mae ein hymchwiliad i'r digwyddiad hynod o drist a thrasig yma yn dal i fynd rhagddo, ac rydym yn gofyn am gymorth y cyhoedd wrth i ni geisio deall beth ddigwyddodd.

“Mae’r gyffordd lle digwyddodd y digwyddiad yn gyffordd brysur, ac rydym yn annog unrhyw un oedd yn yr ardal ar adeg y digwyddiad, ac a welodd yr hyn a ddigwyddodd, i gysylltu. Gofynnir i bobl edrych ar luniau camerâu cerbyd neu CCTV preifat a allai fod yn berthnasol.

“Hoffwn annog pobl i ystyried yr effaith ar deulu'r dioddefwr hefyd, ac rydym yn gofyn i chi beidio â rhannu lluniau o'r digwyddiad ar-lein, gan ein bod yn ymwybodol bod deunydd fideo wedi cael ei rannu'n barod.

“Roedd nifer o ffyrdd ar gau wrth i'r heddlu gynnal yr ymchwiliad, gan darfu cryn dipyn ar aelodau o'r cyhoedd. Hoffem ddiolch iddynt am eu hamynedd a'u dealltwriaeth yn ystod y cyfnod hwnnw.”

Gall unrhyw un sydd â gwybodaeth gysylltu â 101 – dyfynnwch y cyfeirnod 2600092224. Neu gallwch chi gyflwyno gwybodaeth ar-lein: https://www.south-wales.police.uk/