Eiddo niwsans wedi cau yng Nghaerdydd yn dilyn cais gan Heddlu De Cymru

Eiddo niwsans wedi cau yng Nghaerdydd yn dilyn cais gan Heddlu De Cymru.

Dros y 18 mis diwethaf, cafwyd galwadau a phryderon cyson ynglŷn â gweithgarwch sy'n ymwneud â chyffuriau yn 30 Planet Steet, Adamsdown.

Mae'r gymuned leol wedi dweud bod unigolion yn mynychu'r eiddo yn ystod y dydd a'r nos i ddelio neu ddefnyddio cyffuriau. Mae hyn wedi arwain at drais mewn rhai achosion.

Mae swyddogion wedi bod yn gweithio mewn partneriaeth â Chymdeithas Tai Cymunedol Caerdydd (CCHA) i fynd i'r afael â'r broblem.

Dywedodd Rachael Shortis, Cwnstabl yr Heddlu o Dîm Cymdogaeth Heddlu De Cymru: "Mae'r eiddo wedi cael ei gogio (‘cuckooed’) gan bobl nad ydynt yn breswylwyr sy'n defnyddio'r safle i ddelio cyffuriau, gan gynnwys crac cocên a heroin.

"Mae hyn wedi cael effaith fawr ar fywydau'r tenantiaid ac wedi gwneud i aelodau o'r gymuned deimlo'n ofnus ac yn bryderus.

"Ystyriwyd dulliau eraill o weithredu a wnaethom drio rhoi'r dulliau hynny ar waith, ond gan fod lefel yr anhrefn mor sylweddol, ystyriwyd mai cyflwyno Hysbysiad Cau oedd y ffordd fwyaf effeithiol o ymdrin â'r mater.

"Gobeithio y bydd yr Hysbysiad Cau hwn yn gwneud i drigolion deimlo'n fwy diogel yn eu cymuned eu hun, yn gwella ansawdd eu bywyd ac yn rhoi rhywfaint o dawelwch iddynt o'r diwedd.”

O dan Ddeddf Ymddygiad Gwrthgymdeithasol, Troseddu a Phlismona 2014, gall yr heddlu wneud cais am hysbysiad cau os yw troseddau neu ymddygiad afreolus neu droseddol yn achosi niwsans difrifol i'r cyhoedd.

Mae'r gorchymyn, a roddwyd yn Llys Ynadon Caerdydd ar 4 Mawrth, yn golygu ei bod yn drosedd i unrhyw un fynd i mewn i'r eiddo yn ystod y tri mis nesaf.

Mae'r tŷ bellach wedi cael ei rwystro â bordiau, ac ni fydd y tenant yn dychwelyd.

Dywedodd Kirsty Ellis, Cyfarwyddwr Tai a Chymunedau yn CCHA: "Daw’r llwyddiant hwn yn dilyn partneriaeth agos rhwng ein tîm yn CCHA a Heddlu De Cymru - yn enwedig tîm y Rhingyll Bleddyn Jones yn y Rhath, sydd wedi bod mor rhagweithiol.

“Rydym yn ymroddedig i barhau i weithio gyda thimau plismona lleol ledled y ddinas.

“Rydym hefyd yn ddiolchgar am gefnogaeth y trigolion a hoffem ddiolch iddynt am eu hamynedd.

“Ein nod yw cydbwyso camau gorfodi effeithiol gyda thosturi gwirioneddol, gan roi'r cymorth angenrheidiol i sicrhau canlyniad cadarnhaol, hirdymor i bawb dan sylw."

Ychwanegodd y Rhingyll Bleddyn Jones, sydd wedi'i leoli yng Ngorsaf Heddlu'r Rhath: “Mae Tîm Plismona Cymdogaeth y Rhath wedi ymrwymo i fynd i'r afael ag ymddygiad gwrthgymdeithasol a gweithgareddau troseddol yn y gymuned.

“Byddwn yn parhau i weithio mewn partneriaeth â darparwyr tai, yr awdurdod lleol, a thrigolion i gadw pobl yn ddiogel."