Diweddariad am lofruddiaeth ym Mhencoed: teulu a phartner yn talu teyrnged i David Rogers

Mae teulu a phartner David Rogers a fu farw yn 58 oed yn yr ysbyty yn dilyn digwyddiad ym Mhencoed ddydd Sadwrn 28 Chwefror, wedi talu teyrngedau i'w hanwyliad.

Dywedodd ei deulu:

"Roedd David yn dad balch i bedwar mab, Aaron, Cory, Kane, a Saul. Roedd yn frawd ffyddlon i'w chwaer, Bethan, yn ewythr i'w nith a'i nai, Lewis a Leah, ac yn fab annwyl i'w fam, Judy. Roedd yn gyn-bartner cariadus i fam ei blant, Michelle. Roedd teulu yn golygu popeth iddo. Roedd wrth ei fodd yn mynd ar anturiaethau dramor, chwarae golff yn y Vale Resort, a chael ei adnabod fel 'Disco Dave'."

Ychwanegodd ei bartner, Abbie:

"Roedd pawb oedd yn ei adnabod yn ei garu. Fy mherson, fy ffrind gorau, am byth. Fel teulu dydyn ni ddim hyd yn oed yn gwybod sut i ddechrau symud ymlaen hebddo. Doedd dim llys-dad gwell i'r plant, gan ei fod ef bob amser yn mynd y tu hwnt i ddisgwyliadau. Fel teulu, mae twll yn ein bywydau bellach na fydd byth yn cael ei lenwi. Mae angen amser arnon ni nawr i alaru. Fe wnaethon ni ddod o hyd i'r un am byth pan wnaethon ni ddod o hyd i'n gilydd. Bydda i'n dy garu di bob amser, David."

Bu farw David Rogers yn yr ysbyty ddydd Llun 2 Mawrth, lle roedd wedi bod mewn cyflwr difrifol ers cael ei dderbyn yn dilyn y digwyddiad ddydd Sadwrn 28 Chwefror. Mae ei deulu yn cael ei gefnogi ar hyn o bryd.

Cafodd Liam Walters, 26, o Bencoed, ei gyhuddo o'i lofruddiaeth. Ymddangosodd yn Llys Ynadon Caerdydd ddydd Mercher 4 Mawrth lle cafodd ei gadw, a bydd yn ymddangos nesaf yn Llys y Goron Caerdydd ddydd Iau 5 Mawrth.

Mae ditectifs sy'n ymchwilio i'r llofruddiaeth yn parhau â'u hapêl ac anogir unrhyw un a oedd yng nghyffiniau Felindre Road, Pencoed, rhwng 12.30am a 4.30am ddydd Sadwrn 28 Chwefror i gysylltu os nad ydyn nhw wedi siarad â swyddogion eto.

Dylai unrhyw un sydd â gwybodaeth gysylltu ag 101, gan ddyfynnu'r cyfeirnod 2600063517.