Carcharu dynion o'r Barri a oedd yn rhedeg llinell cyffuriau ac yn cyflenwi cocên

Mae tri dyn o'r Barri wedi cael eu carcharu am ymwneud â llinell cyffuriau a oedd yn cyflenwi cocên ym mhob rhan o'r dref.

Cafodd Ryan Greening, Daniel Laity ac Adam Hartery eu carcharu yn Llys y Goron Caerdydd ddydd Mawrth, 17 Mawrth, ar ôl pledio'n euog yn flaenorol i droseddau cyffuriau.

Chwalodd eu hymgyrch ar ôl i dîm Troseddau Cyfundrefnol Caerdydd a'r Fro lansio Ymgyrch Jensia.

Nododd ymchwiliad fforenseg ffôn trylwyr a ddadansoddodd negeseuon rhwng dyfeisiau mai Greening a Hartery oedd prif ddeiliaid y llinell, gyda Laity a bachgen arall a oedd yn 17 oed yn gweithredu fel rhedwyr – yn dosbarthu'r cyffuriau ac yn casglu arian parod.

Cawsant eu harestio ar 19 Medi yn ystod cam gorfodi'r ymgyrch. Roedd Greening yn cuddio yng nghyfeiriad Laity a chafodd Hartery ei arestio yn ei gyfeiriad cartref.

Cafodd y bachgen 17 oed y credir ei fod wedi cael ei orfodi i ymwneud â'r llinell cyffuriau ei ddiogelu gan Heddlu De Cymru.

Cafodd Ryan Greening, 32 oed, Daniel Laity, 32 oed, ac Adam Hartery, 31 oed eu cyhuddo o gynllwynio i gyflenwi cocên a chawsant eu dedfrydu i gyfanswm o 11 mlynedd a naw mis.

Carcharwyd Ryan Greening am chwe blynedd, carcharwyd Adam Hartery am dair blynedd a chwe mis, a charcharwyd Laity am ddwy flynedd a thri mis.

Dywedodd y Ditectif Gwnstabl Bathan Williams: “Roedd y grŵp hwn yn cyflenwi cocên i'w gwsmeriaid ei hun a hefyd yn cyflenwi cyffuriau i weithredwyr llinellau cyffuriau eraill, a oedd yn golygu ei fod yn gyflenwr sylweddol yn yr ardal.

“Diolch i waith rhagorol ein harbenigwyr ar ddata fforenseg, llwyddwyd i nodi eu rolau yn yr ymgyrch ac yn bwysicach fyth, i nodi bod y grŵp yn dylanwadu ar fachgen 17 oed agored i niwed ac yn ei orfodi i weithredu ar ei ran.”