Yr heddlu’n ymweld â busnesau yn rhan o ymgyrch cam-fanteisio ar blant

Mae Heddlu De Cymru yn gweithio gyda busnesau ledled De Cymru i godi ymwybyddiaeth o arwyddion cam-fanteisio, troseddol neu rywiol, ar blant. 

Yn rhan o ymrwymiad parhaus Heddlu De Cymru i ymdrin â cham-fanteisio ar blant, mae swyddogion yn ymweld â gwestai, safleoedd trwyddedig, siopau a chwmnïau tacsi i’w dysgu nhw sut i adnabod yr arwyddion a sut i roi gwybod am achosion posibl o gam-fanteisio ar blant. 

Mae swyddogion yn siarad â’r busnesau yn rhan o Ymgyrch Makesafe, menter genedlaethol i ddysgu’r diwydiant lletygarwch am gam-fanteisio ar blant. Mae’r lansiad yn cyd-fynd â Diwrnod Cam-fanteisio ar Blant hefyd.

Meddai Ditectif Brif Arolygydd Gareth Jones:

“Os ydych chi’n gweithio mewn gwesty, siop, safle trwyddedig neu’n gyrru tacsi, mae gennych chi ran hollbwysig i’w chwarae yn adnabod ymddygiad amheus ac yn ein helpu ni i amddiffyn plant rhag cam-fanteisio. Po fwyaf y gallwn ni ei wneud i wella ymwybyddiaeth pobl a gwneud yn siŵr eu bod yn gwybod beth yw’r arwyddion i gadw llygad amdanynt, y mwyaf y gallwn ni leihau’r cyfleoedd i bobl gam-fanteisio ar blant yn y ffordd yma. 

“Gan weithio gyda’n partneriaid, byddwn yn parhau i godi ymwybyddiaeth o faterion diogelu a gwneud yn siŵr bod cymaint o bobl â phosibl yn gallu cael y cymorth a’r hyfforddiant angenrheidiol i adnabod arwyddion cam-fanteisio’n rhywiol ar blant ac i ddiogelu plant.”

Ymhen ychydig fisoedd, bydd yr ymgyrch yn symud ymlaen at y cam profi. Bydd busnesau’n cael prawf ac wedyn yn cael ôl-drafodaeth gyda swyddogion a fydd wedi nodi cyfleoedd pellach ar gyfer hyfforddiant diogelu, datblygu ymwybyddiaeth o gam-fanteisio ar blant, a sut i dynnu sylw at y pryderon hyn.

I gael rhagor o wybodaeth ynglŷn ag Ymgyrch Makesafe, gan gynnwys posteri i’w harddangos mewn ystafelloedd staff neu i’w hanfon at staff, ewch i: http://www.south-wales.police.co.uk/cy-GB/heddluoedd/heddlu-de-cymru/ardaloedd/campaigns/ymgyrchoedd/ymgyrch-makesafe/