Dyn o Dreforys wedi'i garcharu ar ôl rhannu fideos anweddus o blant ac anifeiliaid ar-lein

Mae dyn o Abertawe wedi cael ei garcharu ar ôl iddo bledio'n euog i sawl trosedd yn ymwneud â bod â lluniau anweddus o blant ac anifeiliaid yn ei feddiant a'u rhannu.

Cafodd Kyle Jones, 42 oed o Dreforys, ei arestio ar ôl iddo gael ei gysylltu â chyfrif Kik a oedd wedi uwchlwytho fideos anweddus Categori A o blant i'r rhyngrwyd yn 2023.

Ar ôl iddo wadu'r troseddau mewn cyfweliad, daethpwyd o hyd i dystiolaeth o dros 3000 o luniau a fideos anghyfreithlon o blant ac anifeiliaid ar ddyfeisiau a briodolwyd i Jones yn dilyn ymchwiliad manwl ar y cyd rhwng Tîm Ymchwiliadau Ar-lein Heddlu De Cymru a'r Uned Fforenseg Ddigidol. Roedd nifer mawr o'r lluniau a'r fideos yn perthyn i'r categori mwyaf difrifol, sef Categori A.

Plediodd Jones yn euog i dri achos o greu llun anweddus o blentyn, tri achos o rannu llun anweddus o blentyn, un achos o fod â lluniau pornograffig eithafol yn cynnwys anifail yn ei feddiant, ac un achos o fod â llun gwaharddedig o blentyn yn ei feddiant.

Dywedodd y Ditectif Gwnstabl Thomas Connick:

"Roedd Kyle Jones â nifer sylweddol o luniau anweddus o anifeiliaid a phlant yn ei feddiant, a gwnaeth e rannu’r delweddau hyn. Roedd yn gwybod bod yr hyn yr oedd yn ei wneud yn hollol annerbyniol.

“Yn dilyn ymchwiliad trylwyr, mae Jones yn haeddu mynd i'r carchar.

“Roedd gweithredoedd Jones yn gwbl warthus a byddan nhw wedi achosi gofid sylweddol i'w deulu a'r gymuned leol. Gobeithio y gallan nhw fod yn dawel eu meddwl yn gwybod bod Jones bellach yn y carchar.

"Mae'n werth cofio nad troseddau heb ddioddefwyr yw troseddau sy'n ymwneud â lluniau anghyfreithlon o'r fath - mae unigolion sy'n cael gafael ar y delweddau hyn yn creu mwy o alw, a dim ond trwy gam-drin mwy o unigolion sy'n agored i niwed y gellir ateb y galw hwnnw. Mae Heddlu De Cymru wedi ymrwymo i helpu i atal y cam-drin ffiaidd hwn a bydd yn targedu pawb sy'n galluogi ac yn annog camdriniaeth o’r fath."