Carcharu dros 70 o bobl a tharfu ar 8 llinell gyffuriau yn ystod wythnos ddwysáu

Mae wythnos o waith dwysáu yn mynd i'r afael â throseddau sy'n gysylltiedig â chyffuriau wedi arwain at arestio dros 70 o bobl ledled ardal Heddlu De Cymru.  

Arweiniodd gweithgarwch yr heddlu, fel rhan o Wythnos Dwysáu Gwaith ar Linellau Cyffuriau at arestio a chyhuddo pobl, ynghyd ag atafaelu cyffuriau dosbarth A a B, cyllyll ac arian parod. 

Cydweithiodd timau Troseddau Cyfundrefnol, timau Cuddwybodaeth a thimau Camfanteisio ledled de Cymru i gyflawni gweithrediadau wedi'u hanelu at ddiogelu dioddefwyr a oedd wedi dioddef camfanteisio, adnabod y rhai sy'n gwerthu cyffuriau yn ein cymunedau a'u harestio, a chau llinellau cyffuriau ledled ardal yr heddlu. 

Hefyd treuliodd timau cymdogaeth amser yn y gymuned yn benodol i godi ymwybyddiaeth o'r risgiau a'r tactegau sy'n cael eu defnyddio i gamfanteisio ar bobl sy'n agored i niwed i symud eu cyffuriau ar eu rhan, yn ogystal â phatrolio'r ardaloedd sy'n gysylltiedig â gweithgarwch Llinellau Cyffuriau.  

Roedd canlyniadau'r wythnos ddwysáu rhwng 2-8 Mawrth yn cynnwys:  

• 77 o arestiadau 

• Atafaelu a chau 8 llinell gyffuriau 

• Diogelu 55 o bobl, gan gynnwys 41 o bobl o dan 18 oed 

• Atafaelu 580g o grac cocên 

• Atafaelu 455g o heroin  

• Atafaelu 3806g o gocên 

• Atafaelu 760g o resin canabis 

• Atafaelu 3140g o ganabis bud 

• Atafaelu £66,572 mewn arian parod 

• Atafaelu 11 arf tanio ffug 

• Atafaelu 7 arf llafnog 

• Atafaelu 64 o ffônau symudol a oedd yn gysylltiedig â gweithgarwch cyffuriau 

Atafaelu canabis a fêps canabis pan gafodd cerbyd ei stopio ym Merthyr.

Dywedodd y Ditectif Uwch-arolygydd Matthew Cox: "Yn Heddlu De Cymru, rydym yn ymrwymedig yn ein hymdrechion i fynd i'r afael â chyflenwi cyffuriau yn ein cymunedau, dod o hyd i'r rhai sy'n atebol a diogelu'r rhai y camfanteisiwyd arnynt er budd eraill. 

"Arweiniodd yr wythnos hon o ddwysáu, gan gydweithio â heddluoedd a phartneriaid cyfagos at ddymchwel llawer o fentrau troseddol ac atafaelu cyffuriau, arfau ac arian parod a oedd yn gysylltiedig â gweithgarwch anghyfreithlon. 

"Ond, hoffwn roi sicrwydd i'r cyhoedd bod ymdrechion i fynd i'r afael â'r math hyn o droseddau yn parhau bob awr o'r dydd, ac mae ein timau'n ymrwymedig i ganfod ac amharu ar bob math o droseddu a chamfanteisio sy'n ymwneud â chyflenwi cyffuriau."