Cydnabod swyddogion am eu dewrder ar ôl achub menyw ar y traeth yn y tywyllwch

Mae chwech o swyddogion Heddlu De Cymru wedi cael eu cydnabod ar ôl achub menyw a oedd wedi mynd i drafferthion ar Draeth Aberafan.

Tua 9:40pm nos Iau, 11 Rhagfyr, pan oedd gwelededd yn wael iawn a'r tywydd yn hynod heriol, daeth un o swyddogion heddlu Sandfields, PC Molly Cana, o hyd i'r fenyw 66 oed o Aberafan yn sownd ben i waered rhwng y morglawdd a'r pier.

Nid oedd y fenyw yn gallu symud ac roedd ei bywyd mewn perygl dybryd wrth i'r tonnau guro'r pier, a throchi ei phen dro ar ôl tro.

Ni allai'r swyddogion gyrraedd y fenyw yn gorfforol oherwydd y risg y byddent yn cael eu hysgubo allan i'r môr. Fodd bynnag, gyda chymorth mab yng nghyfraith y fenyw, Jamie, llwyddodd y swyddogion i glymu rhaff o amgylch ei phigwrn a ffurfio cadwyn ddynol i'w thynnu allan, cyn rhoi cymorth cyntaf iddi.

Roedd y fenyw wedi cael anafiadau difrifol i'w choes, ei hwyneb, ei breichiau a'i chorff, ac roedd angen triniaeth arni ar gyfer anaf i groth ei choes, deg asen a oedd wedi torri ac anaf i'r ddueg, ymhlith anafiadau eraill.

Arhosodd y swyddogion gyda'r fenyw nes i wylwyr y glannau gyrraedd.

Mae PC Molly Cana, SPC Colin Davies, SPC David Bird, PC Robert Morgan, PC Daniel Davies a'r Rhingyll Paul Bamsey oll wedi cael eu henwebu am wobr dewrder.

Dywedodd yr Arolygydd Will John: “Dangosodd yr holl swyddogion ddewrder aruthrol mewn amodau peryglus ac anodd iawn.

"Rhoddodd y swyddogion ddiogelwch y fenyw o flaen eu diogelwch eu hunain a does dim dwywaith yn fy marn i y byddai canlyniadau'r digwyddiad hwn wedi bod yn llawer gwaeth i'r fenyw pe na bai'r swyddogion wedi dod o hyd iddi pan wnaethon nhw.

“Yn bendant gwnaeth meddwl chwim y swyddogion a mab yng nghyfraith y fenyw, Jamie, achub ei bywyd.”