Dedfrydu unigolyn yn ei arddegau a geisiodd ffoi rhag yr heddlu mewn ymlid peryglus drwy'r Barri gyda chyffuriau yn ei gar

Mae deliwr cyffuriau o'r Barri a geisiodd ffoi rhag yr heddlu mewn ymlid ar gyflymder drwy'r dref – dan ddylanwad canabis – wedi cael ei garcharu.

Cafodd Jack Finch, 19 oed, ei weld gan swyddogion ar batrôl yn ystod oriau mân fore ddydd Llun, 17 Tachwedd. Gwnaethant roi arwydd iddo stopio, ond gyrrodd i ffwrdd.

Yn fuan wedyn, gwnaeth swyddog plismona'r ffyrdd barhau â'r ymlid, ac yr hyn a ddilynodd oedd ymlid peryglus drwy'r Barri, lle gyrrodd Finch ar gyflymder o 80mya mewn parthau 20mya yn ogystal â gyrru y ffordd anghywir o gwmpas cylchfannau. Ar un adeg, methodd gyrrwr arall o drwch blewyn.

Ar ôl tua deg munud, rhoddodd Finch orau i geisio ffoi, gan stopio'r car a chwifio ei ddwylo allan o'r ffenestr ar ochr y gyrrwr.

Cynhaliodd y swyddogion brawf cyffuriau ar ochr y ffordd, a gadarnhaodd bod Finch o dan ddylanwad canabis.

Atafaelwyd bag Gucci a oedd yn cynnwys cocên gwerth £13k, cloriannau digidol, arian parod a bat pêl-fas o'i gar.

Cafodd bron £10k mewn arian parod, canabis bud a deg bag o gwcis a oedd yn cynnwys canabis eu hatafaelu hefyd.

Daeth swyddogion o hyd i dystiolaeth glir o ffonau delio cyffuriau a oedd yn gysylltiedig ag ef.

Cafodd ei gyhuddo o fod â chocên yn ei feddiant gyda'r bwriad o'i gyflenwi, bod â chanabis yn ei feddiant gyda'r bwriad o'i gyflenwi, ymwneud â chyflenwi cocên, ymwneud â chyflenwi canabis, caffael eiddo troseddol – sef arian, gyrru car yn beryglus, gyrru car heb drwydded, gyrru heb yswiriant, a gyrru tra roedd mewn cyflwr anaddas drwy gyffuriau.

Aeth ymlaen i bledio'n euog, a chafodd ei ddedfrydu i 32 mis mewn Sefydliad i Droseddwyr Ifanc yn Llys y Goron Caerdydd ar 14 Ionawr.

Dywedodd y Ditectif Gwnstabl Lloyd Willmott o Uned Troseddau Cyfundrefnol Caerdydd a'r Fro: “Roedd Jack Finch yn ceisio ffoi rhag yr heddlu mewn ymlid peryglus drwy'r Barri, gan wybod am yr hyn a oedd yn ei gar. Roedd yn peryglu ei hun, swyddogion ac aelodau o'r cyhoedd mewn ymgais i beidio â chael ei ddal. Ond mae canlyniadau i'w benderfyniadau, a dim ond mater o amser oedd hi cyn iddo gael ei arestio – rwy'n gobeithio y bydd yn defnyddio'r amser y bydd yn ei dreulio mewn sefydliad i droseddwyr ifanc yn ddoeth, i fyfyrio ar y dewisiadau y mae wedi'u gwneud. Yn 19 oed, caiff gyfle i newid a thrawsnewid ei fywyd.”

Mae gyrru dan ddylanwad alcohol neu gyffuriau yn hynod beryglus a gall effeithio ar eich gyrru. Gall alcohol a chyffuriau greu hyder ffug hefyd, sy’n gallu arwain at fwy o ymddygiad cymryd risg, sy'n peryglu eich bywyd chi a bywydau pobl eraill.