Carcharu gang delio cyffuriau o Gaerdydd am fwy na 45 o flynyddoedd

Mae naw person wedi cael eu carcharu am fwy na 45 o flynyddoedd am eu rhan mewn rhwydwaith cyffuriau mawr a oedd yn gweithredu o Drelái, Caerdydd.

Cawsant eu harestio yn dilyn ymchwiliad gan Uned Troseddau Cyfundrefnol Caerdydd a'r Fro, o Heddlu De Cymru, fel rhan o Ymgyrch Sittella.

Roedd y grŵp – dan arweiniad Ricardo Brown – yn rhedeg llinell gyffuriau 'MJ' a oedd yn recriwtio pobl ifanc yn eu harddegau ac oedolion ifanc fel rhedwyr, yn aml yn reidio e-feiciau i ddosbarthu cyffuriau a chasglu arian.

Casglodd swyddogion dystiolaeth helaeth, gan gynnwys fideos a ffotograffau o aelodau'r grŵp yn 'coginio' crac cocên, yn pwyso cyffuriau ac yn gafael mewn symiau mawr o arian.

Roedd un ddelwedd, a gymerwyd o'r cyfryngau cymdeithasol, yn dangos tri aelod o'r grŵp - Brown, Levi Robson, a Jaydon Watkins - yn eistedd mewn Lamborghini wedi'i rentu.

Dangosodd delweddau pellach fod Brown yn cynhyrchu symiau enfawr o arian ac yn byw bywyd afradlon.

Yn sgil ymchwiliad trylwyr a'r dystiolaeth aruthrol, plediodd y naw aelod yn euog i nifer o droseddau cyffuriau.

Pan gawsant eu harestio ym mis Rhagfyr 2024, daeth llinell cyffuriau MJ, y tybir ei bod wedi bod yn gweithredu ers 2020 yn bennaf yng Nghaerdydd, ond hefyd mewn ardaloedd eraill yn Ne Cymru, i ben.

Cafodd Ricardo Brown a'i gyd-droseddwyr eu dedfrydu yn Llys y Goron Caerdydd ddydd Iau, 21 Ionawr a dydd Gwener, 22 Ionawr.

Clywodd y llys am farwolaeth defnyddiwr cyffuriau amhrofiadol y gellid ei phriodoli'n uniongyrchol i linell MJ.

Ym mis Mehefin 2020, cysylltodd cwsmer, nad oedd wedi defnyddio heroin o'r blaen, â llinell MJ a phrynodd heroin. Bu farw o fewn 48 awr, a nodwyd mai achos ei marwolaeth oedd 'gwenyndra cyffuriau cymysg, gan gynnwys heroin.'

 Cafodd y grŵp ei ddedfrydu fel a ganlyn:

• Ricardo Brown, 26 oed, o Butetown, oedd arweinydd y grŵp troseddau cyfundrefnol am bedair blynedd. Plediodd yn euog i gynllwynio i gyflenwi cyffuriau Dosbarth A a chafodd ei garcharu am 12 mlynedd a phum mis.
• Plediodd Dylan Stranger, 25 oed, o'r Barri, a fu'n gweithio'n agos gyda Brown, yn euog i gynllwynio i gyflenwi cyffuriau Dosbarth A a chynllwynio ag eraill i ymwneud â chyflenwi cyffur Dosbarth B, a chafodd ei garcharu am saith mlynedd a naw mis.
• Plediodd Jaydon Watkins, o Drelái, a oedd yn gweithredu llinell cyflenwi canabis a oedd yn gysylltiedig â'r grŵp, yn euog i gynllwynio i gyflenwi cyffuriau Dosbarth A a chynllwynio ag eraill i ymwneud â chyflenwi cyffuriau Dosbarth B. Tair blynedd.
• Roedd Sam Hatton, 18 oed, o Drelái, yn rhedwr ac yn ddeliwr ar y stryd i'r grŵp. Gwahanodd o linell MJ i sefydlu ei linell gyffuriau ei hun a phlediodd yn euog i gynllwynio i gyflenwi cyffuriau Dosbarth A, cynllwynio ag eraill i ymwneud â chyflenwi cyffuriau Dosbarth B, ac ymwneud â chyflenwi cocên. Cafodd ei garcharu am bum mlynedd.
• Bu Levi Robson, 24 oed, o Drelái, yn rheoli cyflenwad cyffuriau ac yn cyfarwyddo rhedwyr. Plediodd yn euog i gynllwynio i gyflenwi cyffuriau Dosbarth A a chafodd ei garcharu am dair blynedd a chwe mis.
• Cafodd Ieuan Coombes, 21 oed, o Drelái, a oedd yn ymwneud â dosbarthu cyffuriau tu hwnt i Gaerdydd ac a blediodd yn euog i gynllwynio i gyflenwi cyffuriau Dosbarth A ac ymwneud â chyflenwi cocên, ei garcharu am dair blynedd ac wyth mis.
• Bu Lewis Adams, 27 oed, o'r Barri, yn cyflenwi symiau cyfanwerthol o gocên ac yn cefnogi'r gadwyn gyflenwi ehangach - plediodd yn euog i gynllwynio i gyflenwi cyffuriau Dosbarth A a chafodd ei garcharu am bedair blynedd a phum mis.
• Plediodd Thomas Haysham, 25 oed, o'r Barri, yn euog i gynllwynio i gyflenwi cyffuriau Dosbarth A a chynllwynio ag eraill i ymwneud â chyflenwi cyffuriau Dosbarth B a chafodd ei garcharu am bum mlynedd a deg mis.
• Cafodd Stacey Cassemis, 37 oed o Drelái, a wnaeth ganiatáu i'r grŵp ddefnyddio ei chartref, lle ddaeth swyddogion o hyd i floc cilogram o gocên, fel safle i baratoi a choginio crac cocên, ddedfryd ohiriedig o ddwy flynedd o garchar.

Dywedodd yr Uwch-swyddog Ymchwilio, Ditectif Prif Arolygydd Tim Jones, o Heddlu De Cymru:

"Roedd hon yn ymgyrch droseddol hynod gyfundrefnol ag arweinyddiaeth glir a rolau y'i diffiniwyd, wedi'i hysgogi'n llwyr gan elw heb unrhyw ystyriaeth i'r niwed a achoswyd i eraill.
“Roedd Ricardo Brown a'i gyd-droseddwyr yn gyfrifol am gyflenwi symiau sylweddol o gyffuriau Dosbarth A a Dosbarth B.
“Yr hyn sy'n gwneud eu troseddau hyd yn oed yn waeth yw'r ffaith iddynt gamfanteisio ar blant – ni wnaethant feddwl ddwywaith am eu rhoi mewn perygl a pheri risg ddifrifol iddynt, a hynny oherwydd eu barusrwydd a'u helw eu hunain.
“Y realiti trist yw bod achosion lle mae gangiau cyffuriau yn camfanteisio ar blant ifanc yn gyffredin – bydd delwyr yn canfod y bobl fwyaf agored i niwed yn ein cymunedau ac yn eu rhoi mewn perygl wrth iddyn nhw redeg pethau yn y cefndir.
“Mae hyn yn digwydd heddiw, mewn cymunedau ledled De Cymru, ac mae cyfrifoldeb a rhwymedigaeth foesol ar bob un ohonom i chwilio am arwyddion o gamfanteisio a gweithredu yn eu cylch.
“Drwy wneud hynny, rydym yn carcharu'r delwyr a hefyd yn achub ac yn diogelu plant sydd, am ba reswm bynnag, wedi cael eu dal mewn bywyd truenus a pheryglus yn nwylo troseddwyr.”