Carcharu dyn o Abertawe a oedd yn rhedeg cylch masnachu mewn cyffuriau

Mae dyn o Abertawe a oedd yn rhedeg cylch masnachu mewn cyffuriau wedi cael ei garcharu.

Roedd Abbas Al-Sulaimawi, 22 oed o Waun Wen, yn rhedeg llinell gyffuriau “Milly”, a oedd yn anfon negeseuon testun mewn swmp at ddefnyddwyr cyffuriau yn cynnig cyflenwadau o grac cocên a heroin.

Roedd Al-Sulaimawi yn newid rhif ei linell gyffuriau yn aml er mwyn osgoi cael ei ddal, ond arweiniodd ymgyrch ar y cyd rhwng Heddlu De Cymru a'r Heddlu Metropolitanaidd at briodoli'r llinellau cyffuriau iddo.

Ar ôl cael ei arestio, canfuwyd bod gan Al-Sulaimawi y cardiau SIM ar gyfer dwy linell gyffuriau wedi'u cuddio mewn band gwasg y tu mewn i ddillad y daethpwyd o hyd iddynt yn ei ystafell wely.

Canfuwyd hefyd ei fod wedi cuddio £3,490 mewn arian parod o dan gwpwrdd yn ei ystafell wely.

Ar ôl pledio'n euog i ymwneud â chyflenwi cocên a heroin, cafodd ei ddedfrydu i bum mlynedd, saith mis a phythefnos yn y carchar.

Dywedodd y Rhingyll Luke Tucker:

“Er mai dim ond 22 oed yw Abbas Al-Sulaimawi, mae ganddo nifer o euogfarnau blaenorol am ymwneud â chyflenwi cyffuriau Dosbarth A.

“Ni all atal ei hun rhag gwerthu'r cyffuriau hyn sy'n achosi poen a gofid ar strydoedd Abertawe. Mae'n braf iawn gweld ei fod bellach wedi cael ei ddwyn i gyfrif, ac y bydd yn treulio blynyddoedd yn y carchar.”