Ymgyrch cenedlaethol i wasgu’n dynn ar droseddau cerbydau'n arwain at arestio 21 o bobl ledled de Cymru

Cafodd 21 o bobl eu harestio a 12 cerbyd eu hadfeddu ledled ardal de Cymru wrth i swyddogion gymryd rhan mewn wythnos genedlaethol o weithredu i dargedu troseddau cerbydau.

Roedd y gwaith hwn yn rhan o Ymgyrch Alliance, sef ymgyrch cydgysylltiedig ar draws y Deyrnas Unedig gyda’r bwriad o fynd i'r afael â rhwydweithiau troseddu cyfundrefnol sy'n gyfrifol am ddwyn cerbydau a throseddau cysylltiedig.

Yn ystod yr ymgyrch, llwyddodd swyddogion o Heddlu De Cymru i adfeddiannu dyfeisiau electronig a ddefnyddir i ddwyn cerbydau di-allwedd ac eiddo roedd swyddogion yn amau ei fod wedi cael ei ddwyn, gan gynnwys ffyn golff a gitarau.

Cafodd dyn 39 oed o Abertawe ei arestio a'i gyhuddo o ddau achos o ddwyn cerbyd yn ystod yr ymgyrch. Cafodd dyn 27 oed o Gaerdydd ei arestio a'i gyhuddo o bedwar achos o ddwyn cerbyd modur hefyd, ymhlith canlyniadau eraill.

Roedd gweithgareddau Heddlu De Cymru yn rhan o ymdrech genedlaethol sylweddol rhwng 32 o heddluoedd a phartneriaid o bob cwr o'r Deyrnas Unedig.

Yn ystod yr wythnos, gweithredwyd mwy na 100 o warantau, arestiwyd dros 285 o bobl, a daethpwyd o hyd i 319 o gerbydau wedi'u dwyn gwerth rhyw £2.6 miliwn. Llwyddwyd hefyd i gau 8 o siopau anghyfreithlon sy’n gwerthu rhannau ceir, a elwir yn "chop shops", a tharfu ar 20 o grwpiau troseddu cyfundrefnol oedd yn gysylltiedig â throseddau fel byrgleriaeth, cyffuriau ac arfau tanio.

Dywedodd arweinydd Heddlu De Cymru ar gyfer troseddau cerbydau, y Ditectif Brif Arolygydd Chris Williams:

"Mae'r ymgyrch llwyddiannus hwn yn dangos bod Heddlu De Cymru yn ymrwymedig i fynd i'r afael â throseddau cerbydau.

"Fel arfer, mae cerbyd yn un o fuddsoddiadau mwyaf person, a dyma yw ei ddifyrrwch pennaf yn aml. I lawer, mae cerbyd yn rhan hanfodol o fywyd pob dydd. Gall dioddef troseddau cerbydau fod yn brofiad trawmatig ac rydym yn deall yr effaith y gall hynny ei chael.

"Er bod technoleg fodern yn golygu bod cerbydau yn fwy diogel nag erioed y dyddiau hyn, bydd lladron yn defnyddio'r dechnoleg hon i'w helpu i gyflawni troseddau. Gall dyfeisiau diogelwch ychwanegol a dulliau atal gweladwy, fel defnyddio cloeon llyw, fod yn ffordd effeithiol o amddiffyn eich cerbyd rhag lladron."

Mae Ymgyrch Alliances yn cael ei ariannu gan y Swyddfa Gartref a'i arwain gan Gyngor Cenedlaethol Penaethiaid yr Heddlu. Mae'n dod â heddluoedd a phartneriaid arbenigol ynghyd i adnabod troseddwyr cyfundrefnol sy'n ymwneud â throseddau cerbydau ar lefel leol, ranbarthol a chenedlaethol, ac yn tarfu ar yr unigolion hyn a’u herlyn.

Anogir unrhyw un sydd â gwybodaeth am droseddau cerbydau yn ei ardal i riportio'r mater drwy ffonio 101 neu gysylltu â Crimestoppers yn ddienw ar 0800 555 111.