Enwi'r dioddefwr yn yr ymchwiliad i lofruddiaeth ym Mhen-y-bont ar Ogwr

Cafodd swyddogion eu galw i Heol Coety, Pen-y-bont ar Ogwr tua 12:43p.m. ddydd Llun Hydref 19 yn dilyn adroddiad o wrthdrawiad traffig ffyrdd, lle roedd car wedi gwrthdaro â wal.

Ar ôl mynd yno, gwelodd swyddogion fod y gyrrwr wedi dioddef anafiadau yn sgîl trywanu nad oeddent yn gysylltiedig â'r gwrthdrawiad. Cafodd y fenyw ei chludo i'r ysbyty lle bu farw yn ddiweddarach er gwaethaf ymdrechion gorau'r staff meddygol.

Mae'r fenyw wedi cael ei hadnabod yn ffurfiol. Eleanor Barnfield oedd hi, yn 47 oed o Ben-y-bont ar Ogwr, a oedd yn gweithio i Cymoedd i'r Arfordir. Mae teulu Eleanor yn parhau i gael cymorth gan swyddogion cyswllt teuluol sydd wedi'u hyfforddi'n arbennig.

Yn dilyn ymgyrch plismona sylweddol o amgylch Ger-y-Nant, mae dyn 61 oed o Ben-y-bont ar Ogwr wedi cael ei arestio ar amheuaeth o lofruddiaeth. Mae ef yn y ddalfa ar hyn o bryd.

Dywedodd teulu Eleanor, "Mam oedd y person mwyaf caredig, mwyaf cariadus a dewr yn y byd. Roedd hi'n golygu popeth i ni a bydd ei theulu a'i ffrindiau ffyddlon yn ei charu ac yn gweld ei heisiau am byth. Hi oedd ein craig ni."

Dywedodd y Prif Uwch-arolygydd Jason Rees: "Mae ein meddyliau'n parhau i fod gyda theulu Eleanor yn ddiwyro. Rwyf am cadarnhau i'r gymuned fod timau o dditectifs a staff arbenigol wrthi'n ymchwilio. Rydym yn gwerthfawrogi amynedd a chefnogaeth trigolion, yn enwedig y rheini a gafodd eu dadleoli yn dilyn y digwyddiad. Efallai y bydd cymunedau lleol yn sylwi ar fwy o swyddogion heddlu yn yr ardal wrth i'n hymchwiliad barhau"

"Rydym yn annog unrhyw un a allai fod yn dyst i'r digwyddiad hwn neu sydd ag unrhyw wybodaeth berthnasol i gysylltu â ni drwy'r ddolen hon https://mipp.police.uk/operation/62SWP26C41-PO1 gan ddyfynnu'r cyfeirnod 2600342470. Diolch am eich cydweithrediad a'ch dealltwriaeth yn ystod y cyfnod hwn ac rydym yn atgoffa pobl i beidio â thaenu sïon ar-lein am yr amgylchiadau."