Carchar i ddyn o Faesteg am droseddau rhywiol

Mae dyn o Faesteg wedi cael ei garcharu am nifer o droseddau rhywiol yn dilyn ymchwiliad gan Heddlu De Cymru.

Cafodd Christopher Williams, 73 oed o Faesteg, ei garcharu am 11 mlynedd a 9 mis a rhoddwyd gorchymyn atal iddo pan ymddangosodd gerbron Llys y Goron Caerdydd ddydd Mercher 21 Hydref.

Plediodd Williams yn euog i naw cyhuddiad o ymosod yn anweddus ar ferch dan 14 oed, dau gyhuddiad o annog merch dan 14 oed i gyflawni gweithred anwedduster difrifol, un cyfrif o droseddwr 18 oed neu hŷn yn cymryd rhan mewn gweithgarwch rhywiol treiddgar gyda merch dan 13 oed, un cyfrif o droseddwr 18 neu hŷn yn cymryd rhan mewn gweithgarwch rhywiol nad yw'n dreiddgar gyda merch dan 13 oed, un cyfrif o geisio cael cyfathrach rywiol gyda merch dan 13 oed ac un cyfrif o ymosodiad anweddus ar fenyw dros 16 oed.

Bu'r troseddau hyn yn rhychwantu cyfnod o ddeng mlynedd ar hugain ac yn cynnwys nifer o ddioddefwyr.

Dywedodd y Ditectif Gwnstabl Benjamin Lewis:

“Roedd dioddefwyr Christopher Williams yn eithriadol o ddewr a chryf yn rhoi gwybod i rywun am y troseddau yr oeddent wedi’u dioddef, yn enwedig o ystyried bod cymaint o flynyddoedd wedi mynd heibio ers y troseddau hynny.
“Mae’r ymchwiliad hwn, sydd wedi arwain at ddwyn Williams gerbron y llysoedd yn y pen draw, wedi bod yn hir ac yn gymhleth, ac mae difrifoldeb ei droseddau’n cael ei adlewyrchu gan y ddedfryd hir a roddwyd iddo.”