Carchar i ddyn o Swydd Gaerhirfryn a deithiodd i dde Cymru a chyflawni troseddau rhywiol

Carcharwyd dyn o Swydd Gaerhirfryn yn dilyn ymchwiliad gan Heddlu De Cymru i droseddau rhywiol yn Nhreherbert.  

Cafodd Samuel Hyde, 35 oed o Swydd Gaerhirfryn, ei ddedfrydu i bedair blynedd o garchar gyda chyfnod estynedig o bedair blynedd ar drwydded ar ôl ei euogfarn.

Cynhaliwyd y dedfrydu yn Llys y Goron Caerdydd ddydd Iau 29 Hydref lle plediodd Hyde yn euog i ymosod ar ferch dan 13 oed drwy gyffwrdd, cymryd rhan mewn cyfathrebu rhywiol â phlentyn, torri Gorchymyn Atal Niwed Rhywiol a meddu ar gyllell mewn man gyhoeddus.

Roedd Hyde wedi bod yn anfon negeseuon at y dioddefwr am tua wythnos ddiwedd mis Mehefin, cyn teithio i lawr o Swydd Gaerhirfryn ddydd Mawrth 30 Mehefin, i geisio cwrdd â hi. Dyma pryd ddigwyddodd yr ymosodiad rhywiol. Llwyddodd y dioddefwr i ddianc a galw am help. Yn fuan ar ôl i swyddogion ddod o hyd i Hyde a'i arestio, dyma pryd y gwelon nhw ei fod yn meddu ar gyllell.

Roedd Hyde eisoes yn destun gorchymyn atal niwed rhywiol a roddwyd iddo yn Llys y Goron Preston ym mis Tachwedd 2019 a'i waharddodd rhag siarad ag unrhyw blentyn o dan 16 oed heb oruchwyliaeth.

Dywedodd y Ditectif Gwnstabl Gareth Thomas:

"Roedd ymddygiad Samuel Hyde tuag at ei ddioddefwr yn warthus ac yn gwbl annerbyniol.
"Gwnaeth fanteisio arni hi a diystyru ei lles yn gyfan gwbl.
"Rydym yn canmol dewrder y dioddefwr wrth ddod ymlaen i ddatgelu beth wnaeth Hyde iddi hi.
"Os ydych chi neu rywun rydych chi'n ei adnabod wedi dioddef cam-drin rhywiol, gofynnwn i chi ei riportio i'r heddlu heb oedi."