Gorchymyn ysbyty i ddyn am gyfnod amhenodol yn dilyn marwolaeth yn Butetown

Mae dyn wedi cael ei roi o dan orchymyn ysbyty am gyfnod amhenodol ar ôl trywanu dyn i farwolaeth yn ei gartref yn Butetown.

Cafwyd Mujeeb Rahman Hassani, 40 oed o Butetown, yn euog yn flaenorol o ddynladdiad Ibrahim Yassin.

Cafodd swyddogion eu galw i adroddiad o ymosodiad difrifol yn Rhodfa Belmont ychydig wedi 9am ddydd Sul 18 Chwefror.

Ymosodwyd ar Mr Yassin, 64 oed, yn ei gartref yn Rhodfa Belmont lle y cafodd ei drywanu sawl gwaith.

Aeth swyddogion i'r lleoliad a chafodd Hassani ei ddal gerllaw ar Stryd James.

Fe gafodd ei gyhuddo o lofruddiaeth, ond yn ystod yr achos llys yn Llys y Goron Caerdydd ym mis Awst 2026, cafodd y rheithgor gyfarwyddyd ffurfiol i ddyfarnu Hassani yn ddieuog.

Clywodd y llys fod gan y diffynnydd gyfrifoldeb lleiedig adeg y digwyddiad.

Mewn teyrnged iddo, dywedodd teulu Mr Yassin: "Safwn gerbron y llys hwn heddiw fel teulu sydd wedi'i lorio'n llwyr gan golli ein tad, Ibrahim Yassin. Roedd yn fwy na thad i ni; roedd yn ffynhonnell cariad, arweiniad a nerth.

Cymerwyd ei fywyd oddi wrthym yn y ffordd fwyaf torcalonnus posibl, gan adael bwlch na ellir fyth ei lenwi. Yr hyn sydd gennym ar ôl yw ein hatgofion gwerthfawr ohono, galar aruthrol, a phoen na all geiriau ei mynegi'n llawn.

"Gofynnwn i bobl gofio ein tad, Ibrahim Yassin, am y ffordd roedd e’n byw ei fywyd, y gymuned a wasanaethodd, a'r teulu a fagodd. Rydym eisiau iddo gael ei gofio am bwy ydoedd, ei ddylanwad ar fywydau pobl eraill a'r cariad a roddodd, ac nid am amgylchiadau ei farwolaeth.

"Ni all dim ddod â'n tad yn ôl na gwaredu’r dioddefaint rydym wedi’i brofi fel teulu. Ond gobeithiwn, drwy'r achos hwn, y caiff cyfiawnder ei weinyddu a'r atgof ohono ei anrhydeddu.

"Roeddem yn ei garu, rydym yn gweld ei eisiau, a bydd yn aros yn ein calonnau am byth."

Dywedodd y Ditectif Brif Arolygydd Claire Lamerton o Dîm Ymchwilio i Droseddau Mawr Heddlu De Cymru: "Roedd Mr Ibrahim Yassin yn dad ymroddedig i’w 11 o blant ac roedd yn cael ei barchu’n fawr yng nghymuned Butetown.

“Wrth reswm, mae ei farwolaeth wedi achosi galar a thrallod aruthrol i'w deulu ac i gymuned glòs Butetown.

"Gobeithiwn y bydd y ddedfryd heddiw yn dod â rhywfaint o ddiweddglo ac ymdeimlad o gyfiawnder i'r teulu yn sgil y golled enbyd hon.

"Maent wedi dangos dewrder ac urddas drwy gydol yr achos llys, ac rwy’n estyn fy nghydymdeimlad diffuant iddynt. “