Carcharu Michael Davies am lofruddiaeth Tracey Davies

Ar 11 Medi yn Llys y Goron Casnewydd cafwyd Michael Davies, 57 oed, o Heol Cefn, Pen-y-bont ar Ogwr, yn euog o lofruddiaeth ar ôl lladd ei wraig Tracey Davies yn anghyfreithlon.

Ar 18 Ebrill gyda'r hwyr, ychydig cyn 9.20pm, cafodd Heddlu De Cymru alwad frys gan aelod o'r teulu a oedd wedi mynd i holi ynghylch y cwpl ar ôl peidio â chael cyswllt am 24 awr. Ar ôl mynd i mewn i'w cartref ar Deras Bryn, Cefn Cribwr, darganfu'r galwr fod Tracey Davies wedi marw yn yr ystafell wely, a bod Michael Davies yn anymwybodol a chanddo anafiadau trywanu.

Cyrhaeddodd y gwasanaethau brys yn gyflym a chadarnhawyd bod Tracey Davies wedi marw. Cafodd Michael Davies ei gludo i'r ysbyty ac yna cafodd ei arestio ar amheuaeth o lofruddiaeth. Cynhaliwyd post-mortem a ddaeth i'r casgliad bod Mrs Davies wedi marw o ganlyniad i dagu.

Cafodd Mr Davies ei ryddhau o'r ysbyty wythnos yn ddiweddarach ac yn ystod ei gyfweliad â'r heddlu cyfaddefodd ei fod wedi tagu ei wraig Tracey Davies ond ni roddodd unrhyw esboniad pam. Yna dywedodd ei fod wedi cymryd gorddos cyn trywanu ei hun.

Yn ystod yr ymchwiliad, datgelwyd bod Michael Davies, a oedd yn gweithio i ffwrdd yn Abu Dhabi, wedi dychwelyd adref i Gefn Cribwr oherwydd ei iechyd meddwl gwael. Dywedodd ei fod yn teimlo'n ansicr, yn genfigennus ac yn baranoiaidd y gallai ei wraig ei adael.

Plediodd Michael Davies yn euog i ddynladdiad ar sail cyfrifoldeb lleiedig, ar ôl cael ei asesu fel un oedd yn dioddef o anhwylder iselder a gorbryder ar adeg y drosedd.

Clywodd y rheithgor dystiolaeth gan dri seiciatrydd fforensig a oedd wedi asesu Mr Davies yn yr achos hwn. Ar ôl trafod yr holl dystiolaeth, penderfynwyd nad oedd ganddo'r amddiffyniad o gyfrifoldeb lleiedig a chafwyd dyfarniad euog am y cyhuddiad o lofruddiaeth.

Dedfrydwyd Michael Davies i garchar am oes, gydag isafswm o 14 mlynedd yn y carchar, pan ymddangosodd gerbron Llys y Goron Casnewydd ddydd Gwener 2 Hydref.

Dywedodd y Ditectif Brif Arolygydd Claire Lamerton o Heddlu De Cymru:

“Mae'r ddedfryd heddiw yn adlewyrchu pa mor ddifrifol oedd gweithredoedd Michael Davies. Mae marwolaeth Tracey Davies a'r ffordd y cafodd ei lladd wedi effeithio'n ddwfn ar y teulu agos ac hefyd ar y gymuned ehangach oedd yn ei hadnabod.
“Yn ystod y treial tynnwyd sylw at y ffaith bod Tracey Davies yn wraig, yn fam, yn chwaer ac yn ffrind ffyddlon ac roedd teulu'n golygu popeth iddi. Byddai'n gwneud unrhyw beth i unrhyw un ac roedd yn wraig gefnogol a chariadus i Mr Davies. Rydym yn gobeithio y bydd y ddedfryd heddiw yn rhoi rhywfaint o gysur i deulu a ffrindiau Tracey, er ein bod yn cydnabod efallai na fydd eu galar byth yn cael ei oresgyn.
“Nid oedd digwyddiadau 18 Ebrill a llofruddiaeth Tracey Davies wedi'u rhagweld. Mae'n hanfodol ein bod yn parhau i godi ymwybyddiaeth am iechyd meddwl a thrais domestig, gan sicrhau bod unigolion yn cael mynediad at y cymorth sydd ei angen arnynt.
“Os ydych chi neu rywun rydych chi'n ei adnabod yn cael trafferth, gallwch gael cymorth drwy gysylltu â gwasanaethau lleol neu linellau cymorth.”

Mae teulu Tracey wedi talu'r deyrnged ganlynol iddi:

“Fel teulu, nid ydym wedi dod i delerau â cholli Tracey, ac ni fyddwn byth yn dod i delerau â hynny.
“Drwy ei cholli mewn ffordd mor ofnadwy a threisgar, mae'n gwaethygu'r boen rydym yn ei theimlo.
"Ni fydd unrhyw ddedfryd i Michael, ni waeth pa mor hir, byth yn dod â Tracey nôl ac ni fydd byth yn gyffelyb i'r gosb i ni fel teulu sy'n gorfod byw heb Tracey.
“Roedd hi'n fam ymroddedig, yn chwaer annwyl, yn ffrind ffyddlon, yn gefnder gariadus ac yn fodryb ac yn bresenoldeb gwirioneddol ddisglair a oedd yn gallu goleuo unrhyw ystafell â'i chwerthin.
“Ei phlant oedd ei balchder mwyaf, ac ymladdodd hi drostyn nhw ag ymroddiad digyffelyb. Rydym yn caru ac yn hiraethu gymaint am Tracey. Byddwn ni bob amser yn ei chofio."