Carcharu byrgler ar ôl iddo dargedu cartrefi yn Sili a Phenarth

Cyfaddefodd y byrgler, Jacob Lawday, un achos o fyrgleriaeth a dau achos o geisio cyflawni byrgleriaeth yn Sili a Phenarth.

Wrth gael ei ddedfrydu, gofynnodd i'r llys ystyried 24 o droseddau eraill yn ymwneud ag achosion o geisio cyflawni byrgleriaeth ym Mhenarth, Sili a Dinas Powys.

Cafodd Lawday, 19 oed o'r Barri, ei ddedfrydu i 32 mis yn y carchar yn Llys y Goron Caerdydd ddydd Mawrth 20 Hydref.

Clywodd y llys fod Lawday wedi torri i mewn i dŷ yn Sili ar 10 Medi a dwyn car Audi tra roedd preswylwyr yr eiddo yn cysgu.

Daeth swyddogion o hyd i'r car y diwrnod nesaf wedi'i adael yn Llandochau.

Disgrifiodd y dioddefwr effaith y fyrgleriaeth ar ei deulu, yn enwedig ei ferched yn eu harddegau a deimlai, wrth reswm, yn ofnus ac yn bryderus, ynghyd â’i gymdogion oedrannus.

Wrth roi datganiad i’r llys, dywedodd: "Gweithiais yn galed i brynu'r car hwnnw a gafodd ei ddwyn, ac mae gwybod bod rhywun arall wedi gyrru’r car ar ôl ei ddwyn yn gythryblus iawn. Achoswyd difrod i’r cerbyd hefyd, a fydd yn arwain at gostau ariannol.

"Mae'r byrgleriaethau wedi effeithio ar fy nghymdogion hefyd ar ôl i’r byrgler geisio torri i mewn i’w tŷ nhw yr un noson.

"Fel teulu, rydyn ni'n gobeithio y bydd Jacob Lawday yn cael cymorth i adsefydlu a chydnabod bod yr hyn y mae wedi'i wneud yn anghywir. Gobeithiwn y gall e symud ymlaen gyda'i fywyd a dilyn trywydd mwy cadarnhaol."

Yn dilyn ymchwiliad i'r byrgleriaethau, defnyddiwyd lluniau teledu cylch cyfyng i adnabod Lawday a'i arestio ar 20 Medi.

Yn ystod ei gyfweliad â'r heddlu, cyfaddefodd mai dwyn ceir oedd ei fwriad erioed ac y byddai'n ennill rhwng £200 a £400 fesul cerbyd i'w wario ar ganabis.

Rydym yn gobeithio y bydd canlyniad yr achos llys yn helpu’r holl ddioddefwyr yn yr achos hwn i deimlo'n fwy diogel yn eu cartrefi eto.

Mae atal a chanfod byrgleriaethau yn flaenoriaeth i Heddlu De Cymru.