Clirio, Dal, Adeiladu: Gostyngiad mewn ymddygiad gwrthgymdeithasol yn dilyn y cam Clirio yn Nyfaty

Mae adroddiadau am ymddygiad gwrthgymdeithasol wedi gostwng fwy na 37% mewn ardal yn Abertawe ar ôl i bartneriaid gymryd camau gweithredu cydgysylltiedig i fynd i'r afael â phroblemau oedd wedi bod yn effeithio ar drigolion ers blynyddoedd lawer.

Lansiodd Bwrdd Gwasanaethau Cyhoeddus Abertawe brosiect Clirio, Dal, Adeiladu o dan y teitl ‘Adeiladu Dyfaty Gwell’ i fynd i'r afael â’r problemau sy'n amharu ar yr ardal i'r gogledd o ganol dinas Abertawe. Mae hon yn ardal sydd wedi profi achosion parhaus o ymddygiad gwrthgymdeithasol, dwyn o siopau, gwerthu cyffuriau a throseddau eraill ers cryn amser.

Mae Clirio, Dal, Adeiladu yn ddull cydnabyddedig o darfu ar droseddau cyfundrefnol difrifol a'u lleihau, gan helpu cymunedau i adfer mannau cyhoeddus, meithrin gwydnwch a chreu cymdogaethau mwy diogel yn y pen draw. Mae'r rhaglen yn dilyn model Clirio, Dal, Adeiladu y Swyddfa Gartref ac yn cyfuno gweithgarwch gorfodi cydlynol, gwaith sefydlogi cymunedau a datblygiad cymdeithasol, economaidd a chymunedol tymor hwy.

Bydd y cam Clirio, sydd wedi cael ei gynnal dan arweiniad Heddlu De Cymru, yn dechrau symud i gam Dal y fenter o 30 Medi. Cyngor Abertawe fydd yn gyfrifol am oruchwylio gweithgarwch yn ystod y cam hwn, gan weithio gyda’i holl bartneriaid yn y Bwrdd Gwasanaethau Cyhoeddus.

Mae'r cam Clir, a lansiwyd ym mis Ionawr eleni, wedi arwain at y canlyniadau canlynol hyd at 13 Hydref:

• Arestiwyd 143 o bobl
• Cyhoeddwyd 93 gorchymyn gwasgaru o dan Adran 35
• Stopiwyd a chwiliwyd 151 o unigolion – cynnydd o 65.9% o gymharu â'r flwyddyn flaenorol
• Cyhoeddwyd 8 Hysbysiad/Rhybudd Gwarchod y Gymuned
• Cynhaliwyd 9 gwarant ar gyfer camddefnyddio cyffuriau

Bu gostyngiad sylweddol hefyd yn nifer yr adroddiadau a gawsom am fasnachu cyffuriau (48%), meddu ar gyffuriau (25.8%), dwyn oddi wrth unigolyn (16.7%), difrod troseddol (14.3%) a thrais heb achosi anaf (13.5%).

Mae’r adran Safonau Masnach wedi rhoi gorchymyn cau i dri busnes lleol yn yr ardal hefyd.

Mae cyllid ychwanegol wedi cael ei ddyrannu wrth i brosiect Clirio, Dal, Adeiladu symud yn ei flaen i gynnal patrolau a galluogi gweithio mewn partneriaeth yn yr ardal.

Mae'r prosiect Clirio, Dal, Adeiladu wedi arwain at arestio nifer o droseddwyr lleol yn Nyfaty a'r ardaloedd cyfagos, eu dwyn gerbron y llysoedd a'u dedfrydu. Mae hyn yn cynnwys:

• Gwerthwr cyffuriau Flynn Johnson Andrews, 28 oed o Hafod. Llwyddodd yr heddlu i'w adnabod drwy negeseuon Snapchat oedd yn ei ddangos yn gwerthu canabis a chetamin. Fe'i dedfrydwyd i bedair blynedd yn y carchar.
• Andrew Flipping, 48 oed, a Paul Martin, 58 oed, oedd wedi ymwneud â chyflenwi cyffuriau Dosbarth A. Cafodd Flipping ei ddedfrydu i wyth mlynedd yn y carchar a chafodd Andrews ddedfryd o bedair blynedd ac wyth mis o garchar.
• Ricco Jones, troseddwr mynych a gafodd ei ddedfrydu i wyth mis yn y carchar ar ôl iddo gael ei gyhuddo o ddwyn, ymosod, achosi difrod troseddol a thorri Gorchymyn Ymddygiad Cymunedol.

Dywedodd y Prif Arolygydd Dros Dro Andrew Hedley:

"Rydym wedi cyrraedd carreg filltir arwyddocaol ym menter Adeiladu Dyfaty Gwell wrth i’r cam Clirio ddod i ben. Mae’r gwaith hwn yn dangos yr hyn mae’n bosibl ei gyflawni pan fyddwn ni’n gweithio mewn partneriaeth yn barhaus ac yn cynnal gweithgarwch sy'n canolbwyntio ar gamau gorfodi. Dros y flwyddyn ddiwethaf, rydym wedi tarfu ar droseddau cyfundrefnol difrifol, wedi targedu'r rheini sy'n gyfrifol am ddelio cyffuriau ac achosi niwed i’r gymuned, ac wedi dwyn nifer o droseddwyr mynych o flaen eu gwell."

"Mae'r gostyngiad yn nifer yr achosion o ymddygiad gwrthgymdeithasol, troseddau sy'n gysylltiedig â chyffuriau a mathau eraill o droseddu yn galonogol, ond nid dyma ddiwedd ein gwaith. Bydd Heddlu De Cymru yn parhau i gynnal presenoldeb sylweddol yn yr ardal a chydweithio â'n partneriaid o Gyngor Abertawe a'r Bwrdd Gwasanaethau Cyhoeddus i sicrhau bod y gwelliannau hyn yn parhau a bod trigolion yn teimlo'n fwy diogel yn eu cymdogaethau o hyd."

"Wrth i ni symud i'r cam Dal, bydd ein hymrwymiad yn aros yr un fath. Byddwn yn parhau i fynd ar drywydd y rheini sy'n ymwneud â throseddau cyfundrefnol difrifol, gweithredu yn sgil yr wybodaeth a gawn gan aelodau o'r gymuned, a chefnogi ymdrechion hirdymor i wneud Dyfaty yn ardal fwy diogel byth i drigolion, gweithwyr ac ymwelwyr. Mae’r neges yn glir: Ni fyddwn yn caniatáu i'r rheini sy'n ceisio achosi niwed ailgydio yn y gymuned hon.

"Os ydych chi'n dioddef unrhyw fath o ymddygiad gwrthgymdeithasol yn eich ardal, rhowch wybod i ni drwy ffonio 101. Ffoniwch 999 bob amser mewn argyfwng.”

Dywedodd Arweinydd Cyngor Abertawe, Rob Stewart:

"Mae'n galonogol iawn gweld y cynnydd a gafwyd hyd yn hyn diolch i’r holl waith gan Heddlu De Cymru, timau'r cyngor, ein partneriaid, a'r bobl leol.

"Mae arwyddion cadarnhaol eraill hefyd. Rydym wedi bod yn gweithio i lanhau a gwella'r ardal ac mae hyb Cyffordd Dyfaty, a agorwyd ym mis Mehefin, eisoes wedi bod yn llwyddiant go iawn.

"Dros y chwe mis diwethaf rydym wedi siarad â llawer iawn o bobl, grwpiau a busnesau o'r ardal leol am yr hyn sydd bwysicaf iddyn nhw. Mae'r ymgysylltu hynny yn rhan hollbwysig o'r gwaith hwn ac rydym wedi ymrwymo i gyflawni'r blaenoriaethau a nodwyd gan aelodau o’r gymuned.

Wedi dweud hynny, nid ydym o dan unrhyw amheuaeth ynghylch y gwaith hwn. Megis dechrau mae'r gwaith o hyd, ac mae llawer mwy i'w wneud. Byddwn yn parhau i gydweithio â'r heddlu, ein partneriaid a thrigolion i adeiladu ar yr hyn sydd wedi'i gyflawni'n barod a gwneud gwahaniaeth parhaol i ardal Dyfaty."