Carcharu dyn o Abertawe ar ôl i reithgor ei gael yn euog o dreisio
Cynnwys y prif erthygl
Mae dyn o Abertawe wedi cael ei garcharu ar ôl cael ei ddyfarnu'n euog o dreisio menyw ac ymosod arni’n rhywiol.
Gwnaeth Caeran Evans, 27 oed o Benlan, ymosod ar y fenyw ym mis Hydref 2024.
Roedd Evans wedi cynnig rhoi lifft adref i’r dioddefwr yn dilyn noson allan. Yn ddiweddarach y noson honno, cafodd fideo ei recordio a'i rannu mewn grwpiau ar blatfformau negeseuon lle gellid gweld Evans yn cymryd cyffuriau oddi ar gorff y dioddefwr, a oedd yn ymddangos fel pe bai hi'n cysgu. Roedd geiriau rhywiol diraddiol wedi'u hysgrifennu ar ei chorff hefyd.
Plediodd Evans yn euog i ymosodiad rhywiol yn Llys y Goron Abertawe ym mis Rhagfyr 2025, ond yn dilyn yr achos llys, fe'i cafwyd yn euog o dreisio gan reithgor ar 16 Medi hefyd.
Mae bellach wedi cael ei ddedfrydu i gyfanswm o saith mlynedd yn y carchar. Mae wedi cael ei wneud yn destun gorchymyn atal yn erbyn y dioddefwr am gyfnod o 15 mlynedd hefyd.
Dywedodd y Ditectif Arolygydd Meirian Evans:
"Cymerodd Caeran Evans fantais o'i ddioddefwr mewn ffordd erchyll a chyfrwys pan oedd hi wedi meddwi.
"Mae'r ffaith ei fod yn gwybod ei fod yn cael ei ffilmio ac wedi penderfynu cario ymlaen er mwyn bodloni ei foddhad rhywiol afiach ei hun yn gwneud y sefyllfa yn fwy ffiaidd byth.
“Diolch i’r drefn, nid oedd y llys yn credu Evans pan oedd e’n gwadu’r honiadau ac mae'r dyfarniad euog a'r ddedfryd o saith mlynedd yn dangos ein bod wedi llwyddo i sicrhau cyfiawnder i'r dioddefwr.
"Rydym yn ei chanmol am ei dewrder wrth roi gwybod am yr hyn a wnaeth Caeran Evans iddi, ac yn gobeithio y bydd hi’n gallu symud ymlaen â'i bywyd."
Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.
Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.
Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Mae cyfoeth o wybodaeth a manylion am wasanaethau cymorth ar gael yma.