Teyrnged i Scot James

Mae teulu Scot James wedi talu teyrnged iddo yn dilyn ei farwolaeth yn ddiweddar.

Bu farw Scot James, 34 oed o Faesteg, yn Ysbyty Brenhinol Morgannwg ddydd Sul 26 Gorffennaf, yn dilyn ymosodiad honedig a ddigwyddodd yn Nhwrci yn gynharach ym mis Gorffennaf.

Cafodd Scot ei gludo o Dwrci yn ôl i Gymru mewn ambiwlans awyr ddydd Gwener 24 Gorffennaf.

Mae ei deulu wedi talu'r deyrnged ganlynol iddo:

"Roedd ein Scot annwyl wrth galon ein teulu ni, ac roedd pawb oedd yn ei adnabod yn ei garu'n fawr. Roedd yn fab, yn ŵyr, yn frawd, yn bartner, yn dad, yn ewythr ac yn ffrind ffyddlon, ac fe gafodd ei garedigrwydd a'i ffyddlondeb ddylanwad ar fywydau cynifer o bobl. Roedd ganddo galon fawr, synnwyr digrifwch gwych, a dawn naturiol i ddod â phobl ynghyd, gan adael argraff barhaol ar bawb a gafodd y fraint o'i adnabod.

"Rydym fel teulu wedi torri ein calonnau. Ni all geiriau fynegi'r boen rydyn ni'n ei theimlo na'r bwlch mae ei farwolaeth wedi'i adael yn ein bywydau. Byddwn yn trysori'r amser gawsom ni gyda Scot, a bydd e wastad yn agos at ein calonnau. Er bod bywyd Scot wedi'i gymryd yn llawer rhy gynnar, ni fydd y cariad a roddodd na'r effaith a gafodd ar y bobl o'i gwmpas byth yn cael eu hanghofio.

"Hoffem ddiolch i bawb am y gefnogaeth, y caredigrwydd a'r tosturi rydych chi wedi'u dangos i'n teulu yn ystod y cyfnod eithriadol o anodd hwn. Diolch yn fawr i bawb sydd wedi gofalu am Scot ac sydd wedi ein cefnogi drwy gydol y profiad ofnadwy hwn.

Gofynnwn i bobl barchu ein preifatrwydd fel teulu wrth i ni alaru gyda'n gilydd a dechrau dod i delerau â'r golled enbyd hon."

Nodyn i’r Golygyddion: Mae awdurdodau yn Nhwrci yn ymchwilio i'r achos gyda chymorth y Swyddfa Dramor, y Gymanwlad a Datblygu. Mae Heddlu De Cymru yn cynorthwyo gyda phroses y crwner ac mae Swyddogion Cyswllt â Theuluoedd yn rhoi cymorth.